ضلعی انتظامیہ منڈی بہاوالدین کے زیر اہتمام عالمی یوم خواتین کے حوالے سے گورنمنٹ پوسٹ گریجوایٹ کالج برائےخواتین میں سیمینار کا انعقاد کیا گیا۔ ڈپٹی کمشنر شاہد عمران مارتھ اور ڈسٹرکٹ پولیس آفیسر رضا صفدر کاظمی نے سیمینار کی صدارت کی۔ اس موقع پر ڈپٹی ڈائریکٹر سوشل ویلفیئر عاطف علی وڑائچ، ڈسٹرکٹ پاپولیشن ویلفیئر آفیسر عتیق الرحمٰن، پرنسپل خواتین کالج مسز توقیر، سپیشل ایجوکیشن سنٹر سمیت اساتذہ اور طالبات کی کثیر تعداد بھی موجودتھی۔
منڈی بہاوالدین ( ایم.بی.ڈین نیوز 08 مارچ 2024) ڈپٹی کمشنر شاہد عمران مارتھ کا سیمینار سے خطاب کرتے ہوئے کہنا تھا کہ پاکستانی خواتین بہتر کارکردگی کا مظاہرہ کرکے ملک و قوم کا نام روشن کر سکتی ہیں، خواتین کو بااختیار بنانے کے حوالے سے پاکستان میں اب تک ہونے والی پیش رفت شاندار ہے۔ حکومت پنجاب وزیر اعلیٰ پنجاب مریم نواز شریف کی رہنمائی میں خواتین کی سماجی و معاشی ترقی کے لئے بھرپور کوشش کر رہی ہے ۔
موجودہ حکومت خواتین کی ترقی اور ان کے تمام شعبہ ہائے زندگی میں کردار کو اجاگر کرنے پر اپنی تمام توجہ اور وسائل کو مرکوز کئے ہوئے ہے اور موجودہ حکومت کے موثر اقدامات کی وجہ سے معاشرے میں خواتین کو اپنی پسند کے ہر شعبے میں کام کرنے کی مکمل آزادی ہے۔ان کا کہنا تھا کہ یہ خوشی کی بات ہے کہ پاکستانی خواتین دن بدن ہرشعبے میں قوم کا سرفخر سے بلند کررہی ہیں۔
ڈی پی او رضاصفدر کاظمی کا کہنا تھا کہ خواتین کی عزت و توقیر ہمارا معاشرتی ہی نہیں دینی فریضہ بھی ہے۔ قرآن پاک میں آج سے کئی سو سال پہلے سورة النساء کا نزول اور اسلام میں عورت کے حقوق بتا کر عورت کو وہ حقوق عطا کئے ہیں جن کا مغربی معاشرہ آج متلاشی ہے۔ تقریب سے دیگر مقررین نے بھی اپنے اپنے خیالات کا اظہار کیا۔
سیمینار میں سپیشل ایجوکیشن سنٹر کے بچوں نے خوبصورت ٹیبلوز پیش کئے جس کو وہاں حاضرین نے خوب محظوظ کیا۔ تقریب میں اپنے اپنے شعبوں میں بہترین کاکردگی کا مظاہرہ کرنے والی خواتین میں اسناد بھی تقسیم کی گئیں۔ تقریب کے اختتام پر ڈپٹی کمشنر اور ڈی پی او کی سربراہی میں خواتین کے حقوق کے حوالے سے آگاہی واک بھی منعقد کی گئی۔