منڈی بہاﺅالدین( ایم.بی.ڈین نیوز 22مئی2021) ڈائریکٹر جنرل پنجاب ایمرجنسی سروس ڈاکٹر رضوان نصیرکی ہدایت پر ڈسٹرکٹ ایمرجنسی آفیسر انجینئر عمران خان کی زیر نگرانی ضلع بھر میں عالمی ہفتہ برائے روڈ سیفٹی منایا جا رہا ہے ۔ اس سلسلے میں ریسکیو 1122 کی طرف سے ریسکیو محافظوں کے ساتھ مل کر شہر کی مختلف شاہراوں پر کیمپ کا انعقاد کیا گیا جس میں ریسکیو اہلکاروں سمیت ٹریفک پولیس کے جوانوں نے بھی حصہ لیا۔
اس موقع پر کمیونٹی سیفٹی انسٹرکٹرز عصمت جاوید اور افضال منہاس نے زاہد محمود گوندل شہید پولیس ڈرائیونگ سکول اور ایلیٹ پولیس سنٹر پر شرکاءکو روڑ سیفٹی اصولوں بارے آگاہی دیتے ہوئے کہا کہ روڑ سیفٹی قوانین سے آگاہی سے حادثات کی شرح میں کمی لائی جا سکتی ہے۔ ڈسٹرکٹ ایمرجنسی آفیسر انجینئر عمران خان نے بیان جاری کرتے ہوئے کہا کہ عالمی ہفتہ برائے روڈ سیفٹی منانے کا مقصد حادثات کی شرح میں کمی لانا ہے۔
ان کا کہنا تھا کہ پنجاب میں تقریباََ ہر ڈیڑھ منٹ میں ایک روڈ ٹریفک حادثہ ریسکیو کو رپورٹ ہوتا ہے جس میں 83فیصد سے زائد حادثات میں صرف موٹر سائیکل سوار شامل ہوتے ہیں انکا مزید کہنا تھا کہ ہمیشہ موٹر سائیکل کی رفتار 50 کلومیٹر سے کم رکھیں، موٹر سائیکل چلاتے ہوئے ہیلمیٹ کا استعمال یقینی بنائیں اور سائیڈ میررز کا استعمال کریں۔