منڈی بہاءالدین (ملک رؤف زبیر) منڈی بہاءالدین شہر اور اس کے گرد و نواح کے دیہات میں غیر اعلانیہ اور طویل لوڈشیڈنگ نے جولائی کی شدید گرمی میں شہریوں کا جینا محال کر دیا ہے۔ درجہ حرارت میں اضافے اور حبس کے اس موسم میں بجلی کی بار بار بندش نے لوگوں کی چیخیں نکال دی ہیں اور انہیں شدید پریشانی کا سامنا ہے۔
گیپکو (GEPCO) حکام کی جانب سے بجلی کی بندش کا کوئی واضح شیڈول جاری نہیں کیا جا رہا، جس کے باعث شہری ذہنی کوفت کا شکار ہیں۔ رات ہو یا دن، بجلی کی آنکھ مچولی نے کاروبار زندگی کو بری طرح متاثر کر رکھا ہے۔ چھوٹے دکاندار اور کاروباری افراد اپنے کام نہیں کر پا رہے، جبکہ گھروں میں بچوں اور بزرگوں کو شدید گرمی اور حبس کا سامنا ہے۔
منڈی بہاءالدین، پھالیہ اور ملکوال میں جولائی 2025 کیلئے لوڈشیڈنگ کا شیڈول جاری
پانی کی قلت بھی لوڈشیڈنگ کے باعث بڑھ گئی ہے کیونکہ بجلی نہ ہونے کی وجہ سے پانی کی موٹریں نہیں چل پاتیں۔ ایک طرف حکومت وافر بجلی کی دستیابی کے دعوے کر رہی ہے لیکن دوسری جانب منڈی بہاءالدین میں اتنی زیادہ اور غیر اعلانیہ لوڈشیڈنگ نے ان دعوؤں کی نفی کر دی ہے۔
شہریوں نے حکومت سے مطالبہ کیا ہے کہ وہ لوڈشیڈنگ کے اس عذاب سے فوری طور پر نجات دلائے اور عوام کو موسم گرما کی اس شدید آزمائش میں ریلیف فراہم کرے۔
