وزیراعلیٰ پنجاب مریم نوازشریف کے ویژن ملاوٹ سے پاک پنجاب کے تحت پنجاب فوڈ اتھارٹی کا صحت دشمن عناصر کے خلاف موثر اقدام.
منڈی بہاءالدین ( ایم.بی.ڈین نیوز 10 جولائی 2025 ) ڈائریکٹر جنرل پنجاب فوڈ اتھارٹی محمد عاصم جاوید کی ہدایت اور ڈپٹی ڈائریکٹر آپریشنز کی زیرنگرانی پنجاب فوڈ اتھارٹی منڈی بہاءالدین کی فوڈ سیفٹی ٹیموں نے ضلع کی مختلف دودھ کی دکانوں اور کلیکشن سینٹرز پر دودھ کے نمونوں کو جدید لیکٹو سکین مشین سے چیک کیا۔
چیکنگ کرنے پر مختلف دکانوں کے دودھ کے نمونے فیل ہونے پر 10 دکانداروں کو ایک لاکھ جرمانہ کیا گیا اور 5 ہزار 760 لیٹر غیر معیاری مضر صحت دودھ کو بھی تلف کیا گیاجبکہ ایک دکاندار کو اصلاح تک کام کرنے سے روک دیا گیا. اسی طرح ایک کلیکشن سینٹر کے خلاف دودھ کے نمونہ کی لیبارٹری رپورٹ فیل آنے پر مقدمہ درج کرا دیا گیا ۔
ڈپٹی ڈائریکٹر آپریشنز کا کہنا تھا کہ شہریوں کو محفوظ و معیاری خوراک کی فراہمی پنجاب فوڈ اتھارٹی کی اولین ترجیح ہے۔ ان کا کہنا تھا کہ غیر معیاری خوراک کی فروخت سنگین جرم ہے، عوام الناس کو محفوظ، خالص اور معیاری خوراک کی فراہمی یقینی بنانے کیلئے صحت دشمن عناصر کے خلاف چیکنگ کا یہ سلسلہ بلا تعطل جاری رکھا جائے گا ۔
انہوں نے بتایا کہ محدد وسائل کے باوجود رواں سال پنجاب فوڈ اتھارٹی کی کاکردگی میں غیر معمولی اضافہ ہوا ہے اور فوڈ سیفٹی ٹیموں کی انسپکشنز اور کاروائیوں کی بدولت فوڈ کوالٹی میں بہت بہتری پائی گئی ہے ۔
ان کا کہنا تھا کہ عوام الناس اپنے گھروں میں استعمال ہونے والا دودھ پنجاب فوڈ اتھارٹی کے دفتر سے مفت ٹیسٹ کرا سکتے ہیں۔ شہریوں کی بڑی تعداد نے صحت دشمن عناصر کے خلاف کاروائیوں پر پنجاب فوڈ اتھارٹی کے ان اقدامات کو سراہا ہے۔
