منڈی بہاؤالدین: بنگلہ دیشی ہائی کمشنر نے چیمبر آف کامرس منڈی بہاءالدین کا دورہ کیا جہاں انہوں نے تجارتی تعلقات کو فروغ دینے پر اتفاق کیا اور باہمی روابط برقرار رکھنے کے عزم کا اظہار کیا تاکہ دوطرفہ تجارتی روابط کو فروغ دیا جاسکے۔
وفد کا استقبال چیمبر آف کامرس اینڈ انڈسٹری منڈی بہاءالدین کے چیئرمین اور دیگر اعلیٰ حکام نے کیا۔ ملاقات میں مختلف اہم تجارتی اور صنعتی امور پر تفصیلی تبادلہ خیال کیا گیا جس میں تاجر برادری کے درمیان دوطرفہ تعاون کو فروغ دینے پر زور دیا گیا۔
ہائی کمشنر اقبال حسین خان نے کہا کہ پاکستان اور بنگلہ دیش کے عوام ثقافتی، مذہبی اور تاریخی رشتوں کے بندھن میں بندھے ہوئے ہیں جنہیں تجارتی ہم آہنگی اور صنعتی تعاون کے ذریعے مزید مضبوط کیا جانا چاہیے۔ انہوں نے منڈی بہاؤالدین کی صنعتوں خصوصاً چاول، فوڈ کلر، فش اور باڈی پارٹس کی صنعت کا ذکر کرتے ہوئے کہا کہ یہ شعبے دونوں ممالک کے درمیان تجارتی شراکت داری کو فروغ دینے میں کلیدی کردار ادا کر سکتے ہیں۔
ہائی کمشنر نے ان صنعتوں میں سرمایہ کاری اور تجارتی تبادلے میں بھی دلچسپی کا اظہار کیا اور کہا کہ منڈی بہاؤالدین کی مصنوعات عالمی معیار کی ہیں اور انہیں پوری دنیا میں متعارف کرایا جا سکتا ہے۔
