فیڈرل انویسٹی گیشن ایجنسی (ایف آئی اے) ہیڈ کوارٹر کی جانب سے 20 سال بعد انسانی اسمگلنگ روکنے کے لیے ایڈوائزری جاری کر دی گئی۔
ایف آئی اے ہیڈ کوارٹر سے ملک بھر کے ڈپٹی ڈائریکٹرز امیگریشن کو مراسلہ جاری کر دیا گیا ہے۔ 15 ممالک، پاکستان کے 9 شہروں اور 2 ایئر لائنز کے مسافروں کی کڑی نگرانی کرنے کی ہدایات دی گئی ہیں۔ یہ ایڈوائزری جولائی سے دسمبر تک آئی بی ایم ایس ڈیٹا بیس کے تجزیہ سے تیار کی گئی۔
ایڈوائزری میں پہلی بار 15 سے 40 سال کی عمر کے غیر ملکی مسافروں کی سخت نگرانی کا حکم دیا گیا ہے۔ایڈوائزری میں آذربائیجان، ایتھوپیا، سینیگال، کینیا، روس، سعودی عرب اور مصر جانے والے مسافروں کی اسکریننگ کا حکم دیا گیا ہے۔ اس کے علاوہ لیبیا، ایران، موریطانیہ، عراق، ترکی، قطر، کویت اور کرغزستان جانے والے مسافروں کی پروفائل بنانے کا حکم بھی جاری کیا گیا ہے۔
مراکش کشتی حادثہ: پھالیہ سے بھی ایک نوجوان کے جاں بحق ہونے کی تصدیق
ڈپٹی ڈائریکٹر امیگریشن کو لکھے گئے خط میں کہا گیا ہے کہ 15 ممالک کو پاکستانی یورپ انسانی سمگلنگ کے لیے ٹرانزٹ ممالک کے طور پر استعمال کرتے ہیں۔ ایڈوائزری کے مطابق 15 ممالک کے وزٹ، سیاحت، مذہبی یا تعلیمی ویزوں پر آنے والے مسافروں کی نقل و حرکت کا جائزہ لیا گیا۔
منڈی بہاؤالدین، گجرات، سیالکوٹ، گوجرانوالہ اور بھمبر سے آنے والے مسافروں کی کڑی نگرانی کا حکم دیا گیا ہے۔ ایڈوائزری میں جہلم، ٹوبہ ٹیک سنگھ، حافظ آباد اور شیخوپورہ سے آنے والے مسافروں کی پروفائلنگ کے لیے بہتر اقدامات کرنے کا حکم دیا گیا۔
ایڈوائزری میں کہا گیا ہے کہ تمام دستاویزات بشمول ریٹرن ٹکٹس اور ہوٹل بکنگ کی اچھی طرح جانچ پڑتال کی جانی چاہیے۔ وزٹ یا ٹورسٹ ویزا پر خصوصی توجہ کے ساتھ، دستاویزات کی تصدیق کی جانی چاہیے، اور مشکوک مسافروں سے ان کے سفری مقصد اور مالی انتظامات کے لیے انٹرویو لیا جانا چاہیے۔
ایڈوائزری میں کہا گیا ہے کہ مشکوک مسافروں کا تفصیلی ریکارڈ رکھا جائے اور کسی بھی بے ضابطگی کی فوری اطلاع دی جائے۔
