محتسب پنجاب (ر) میجر اعظم سلیمان خان کے حکم پر سائلین کی دادرسی کا سلسلہ جاری، 2 کروڑ 17 لاکھ سے زائد مالیت کا کل 3 کنال 11 مرلے سرکاری رقبہ بھی واگزار کروا لیا گیا۔ صوبہ بھر سے مختلف درخواست گزاران نے دفتر ہذا میں سرکاری گزرگاہ اور سرکاری رقبہ پر قبضہ کے حوالے سے شکایت گزاری اور استدعا کی کہ ان قبضہ مافیا سے سرکاری رقبہ واگزار کروایا جائے۔
منڈی بہاوالدین (ایم.بی.ڈین نیوز 14جون 2024 ) اس تناظر میں محتسب پنجاب (ر) میجر اعظم سلیمان خان نے متعلقہ صوبائی افسران کو ہدایات جاری کیں کہ وہ مذکورہ رقبہ ملکیتی صوبائی حکومت کی حسب ضابطہ واگزاری کروائیں۔ اس ضمن میں کارروائی کرتے ہوئے کل 3 کنال 11 مرلے سرکاری رقبہ واگزار کروا لیا گیا ہے، جس کی مارکیٹ ویلیو 2 کروڑ 17 لاکھ سے زائد ہے۔
اس کے ساتھ ساتھ محتسب پنجاب کی کوششوں سے 18 سائلین کو زیر التواء کفن دفن گرانٹ، ماہانہ گرانٹ، میرج گرانٹ اور ڈیتھ گرانٹ کے 50 لاکھ سے زائد روپے کے زیر التوا واجبات بھی ادا کر دئیے گئے۔
محتسب پنجاب میجراعظم سلیمان خان (ر) کے احکامات پر سیکرٹری محکمہ تعمیرات ومواصلات، ڈپٹی ڈائریکٹر لیبر ویلفیئر اور سیکرٹری پنجاب ورکرز ویلفئیر فنڈ نے مختلف اضلاع سے تعلق رکھنے والے 18 درخواست گزار افراد جن کا کیس مختلف وجوہات کی بناء پر التواء کا شکار تھا، ان کی زیر التواء درخواستوں میں 50 لاکھ سے زائد روپے کا قانونی ریلیف فراہم کر دیا ہے۔ درخواست دہندگان نے اس بروقت مدد پرمحتسب پنجاب کا بے حد شکریہ ادا کیا۔
