وزیر اعلیٰ پنجاب مریم نواز شریف کے احکامات کی روشنی میں ضلع منڈی بہاوالدین میں ذخیرہ اندوزوں اور گراں فروشوں کے خلاف سخت کاروائیاںجاری ہیں.
منڈی بہاوالدین ( ایم.بی.ڈین نیوز 11 مارچ 2024)تفصیلات کے مطابق پرائس مجسٹریٹس نے یکم مارچ سے 10 مارچ تک 11 ہزار 242 انسپکشنز کیں اور پرائس ایکٹ کی خلاف ورزیاں پائے جانے پر 254 دکانداروں کو 9 لاکھ 38 ہزار 500 روپے جرمانے کئے اور33 ایف آئی آرز بھی درج کرائی گئی ہیں جبکہ 9 افراد کو گرفتار بھی کیا گیا۔
ڈپٹی کمشنر شاہد عمران مارتھ کا کہنا تھا کہ حکومت پنجاب کی واضح ہدایات کی روشنی میں تمام اشیائے خوردونوش بالخصوص چینی ، دالیں، پھلوں اور سبزیوں کے مقرر کردہ نرخوں پر عملدرآمد کیلئے تمام ممکنہ اقدامات کو یقینی بنانا ضلعی انتظامیہ کی اولین ترجیح ہے۔
اسسٹنٹ کمشنرز اور پرائس کنٹرول مجسٹریٹس روزانہ کی بنیاد پر مارکیٹ کے دورے کر کے اشیائے خودونوش کی قیمتوں کی چیکنگ کریں اورمنڈیوں میں روزانہ کی بنیاد پر سبزیوں اور پھلوں کی آکشن کی نگرانی بھی کریں۔ عادی گراں فروشوں، ذخیرہ اندوزوں اور ناجائز منافع خوروں کو جرمانے کرنے کے ساتھ ساتھ جیل بھی بھجوائیں ۔
