سرگودھا: الیکشن کمیشن آف پاکستان نے پنجاب میں قومی اسمبلی کے حلقہ این اے 85 اور این اے 83 سرگودھا کا انتخاب امیدوار کی موت کے باعث ملتوی کردیا۔
الیکشن کمیشن کی جانب سے جاری نوٹیفکیشن میں کہا گیا ہے کہ امیدوار صادق علی کے انتقال کے باعث قومی اسمبلی کے حلقہ این اے 85 اور این اے 83 میں انتخابات ملتوی کیے گئے ہیں۔ سرگودھا کے مذکورہ حلقے کے ریٹرننگ آفیسر شعیب احمد نسوانہ نے انتخابات ملتوی کرنے کا نوٹیفکیشن جاری کرتے ہوئے کہا کہ حلقے میں انتخابی شیڈول دوبارہ جاری کیا جائے گا۔
الیکشن کمیشن کا کہنا ہے کہ این اے 83 اور 85 سرگودھا میں عام انتخابات روک دیے گئے اور الیکشن کمیشن نے دونوں حلقوں میں الیکشن روکنے کا پبلک نوٹس جاری کر دیا ہے۔
ملک بھر میں 8 فروری کو عام انتخابات ہونے جا رہے ہیں جس میں وفاقی دارالحکومت اسلام آباد کی قومی اسمبلی کے تین حلقوں کے علاوہ قومی اور چار صوبائی اسمبلیوں کے حلقے بھی شامل ہیں۔
