ڈپٹی کمشنر طارق علی بسرا کی زیر صدارت آج ڈی سی آفس میں ڈسٹرکٹ ہیلتھ کونسل کا اجلاس منعقد ہوا۔اجلاس میں سی ای او ہیلتھ ڈاکٹر محمد الیاس گوندل، ڈسٹرکٹ ہیلتھ آفیسر ڈاکٹر افتخار، ڈپٹی ڈی ایچ اوز ڈاکٹر خالد عباسی، ڈاکٹر رضوان تابش، میڈیکل سپرنٹنڈنٹس منڈی بہاﺅالدین ڈاکٹر مہار اختر حسین بلوچ،پھالیہ ڈاکٹر بشریٰ چوہدری، ملکوال ڈاکٹر ناصر وقار،سی او میونسپل کمیٹی محمد فیاض، ڈسٹرکٹ فوکل پرسن برائے پولیو/ای پی آئی رافعہ ناہید، پی اے ٹو سی او ہیلتھ ارسلان رﺅف سمیت دیگر متعلقہ محکموں کے افسران نے شرکت کی۔
منڈی بہاﺅالدین( ایم.بی.ڈین نیوز 07 جولائی2021) اجلاس میں سٹاف کی تنخواہوں کی ادائیگی اور دیگر طبی سہولتوں کی فراہمی اور کارکردگی بارے ایسے امور زیر بحث آئے۔ جس پرڈپٹی کمشنر نے شرکاءاجلاس کی متفقہ رائے کے بعد سٹاف کی تنخواہوں کی ادائیگی کی منظوری دے دی ۔انہوں نے کہا کہ صحت عامہ کی سہولیات کی فراہمی حکومت پنجاب کی اولین ترجیحات میں شامل ہے اورکروڑوں روپے کے بجٹ کی فراہمی کا مقصد شہریوں کو صحت عامہ کی بہترین سہولتوں کی فراہمی کو یقینی بنانا ہے یہی وجہ ہے کہ صحت عامہ کا شعبہ ضلعی انتظامیہ کی اولین ترجیحات میں شامل ہے۔
انہوں نے کہاکہ وزیر اعلیٰ پنجاب کی ہدایت پر تمام ہسپتالوں میں عدم سہولیات کی فراہمی کو یقینی بنانے کے ساتھ ساتھ اپ گریڈ بھی کیا جا رہا ہے۔ اس مقصد کیلئے صوبائی حکومت ہر ممکن وسائل اور فنڈز مہیا کر رہی ہے۔ طارق علی بسرا نے کہاکہ صحت عامہ کی سہولتوں میں کئی گنا اضافے کے بعد سرکاری ہسپتالوں پر مریضوں کا اعتماد بڑھا ہے۔ضرورت اس امر کی ہے کہ محکمہ صحت عوام الناس کی فلاح و بہبود کیلئے بھر پور دلچسپی لیتے ہوئے حکومتی پالیسیوں کا کامیاب بنائیں۔
