منڈی بہاوالدین: پنجاب کے ضلع منڈی بہاوالدین میں جنوری 2026 کے ابتدائی 19 روز کے دوران لڑکیوں اور خواتین کے اغواء کے 17 واقعات رپورٹ ہوئے ہیں، جن میں 17 خواتین اور لڑکیوں کو مبینہ طور پر اغواء کیا گیا ہے جبکہ مقدمات میں 65 سے زائد ملزمان کو نامزد کیا گیا ہے۔
پولیس ریکارڈ اور درج کی گئی ایف آئی آرز کے مطابق یہ واقعات منڈی بہاوالدین شہر اور اس کے گردونواح کے مختلف علاقوں میں پیش آئے۔ ایف آئی آرز میں بتایا گیا ہے کہ متاثرہ لڑکیوں اور خواتین کو مختلف حیلوں بہانوں سے ورغلا پھسلا کر اغواء کیا گیا، جبکہ بعض مقدمات میں زبردستی گاڑیوں میں ڈال کر اغواء کرنے کے شواہد بھی شامل ہیں۔
جماعت اسلامی کے سابق ٹکٹ ہولڈر کو گھر جاتے ہوئے اغوا کر لیا گیا
اغواء ہونے والوں میں 14 سالہ کشف، 15 سالہ نورین، 17 سالہ ایمان، 19 سالہ زینب، 20 سالہ سمیرا، 21 سالہ سویرا، زنیرہ اور عابدہ، 22 سالہ تسکین، 23 سالہ طوبہ اور صباء، 25 سالہ اقراء، فاریہ اور کومل، 28 سالہ نصرت جبکہ 35 سالہ غزالہ اور ریحانہ شامل ہیں۔
متاثرہ افراد کا تعلق ضلع منڈی بہاوالدین کے مختلف علاقوں سے ہے، لواحقین کی مدعیت میں ضلع کے 10 مختلف تھانوں میں مقدمات درج کیے گئے ہیں، جن میں تھانہ صدر منڈی بہاوالدین، تھانہ ملکوال، تھانہ گوجرہ، تھانہ کٹھیالہ شیخاں، تھانہ بھاگٹ، تھانہ قادر آباد، تھانہ سٹی منڈی بہاوالدین، تھانہ پھالیہ، تھانہ پاہٹریانوالی اور تھانہ میانہ گوندل شامل ہیں۔