ڈپٹی کمشنر تسنیم علی خاں نے کہا ہے کہ تعلیم کے بغیر کسی بھی معاشرے کی ترقی نا ممکن ہے ۔جن ممالک کا لٹریسی ریٹ زیادہ ہے وہ ممالک اتنی ہی تیزی سے ترقی کی جانب گامزن ہیں اور پاکستان کا لٹریسی ریٹ ہر سال بہتری کی جانب گامزن ہے۔ انہوں نے کہا کہ محکمہ لٹریسی ضلع منڈی بہاﺅالدین میں علم کی شمع روشن کرنے کیلئے اپنا بھرپور کردار ادا کررہا ہے۔
منڈی بہاﺅالدین ( ایم.بی.ڈین نیوز 30 اگست2022 ) ان خیالات کا اظہار انہوں نے محکمہ لٹریسی کے زیر اہتمام عالمی یوم خواندگی کے حوالے سے منعقدہ تقریب سے خطاب کرتے ہوئے کیا۔اس موقع پر ایڈیشنل ڈپٹی کمشنر ریونیو ملک عباس ذوالقرنین ، سی ای او ایجوکیشن محمد یاسین ورک، ڈپٹی ڈائریکٹر سوشل ویلفیئر عاطف علی وڑائچ، ڈپٹی ڈسٹرکٹ ایجوکیشن آفیسر اسلم نسیم، لٹریسی ٹیچرز و ملازمین عبدالرحمن گجر سمیت دیگر متعلقہ محکموں کے افسران نے شرکت کی۔
ڈپٹی کمشنر تسنیم علی خاں نے تقریب سے خطاب کرتے ہوئے کہا کہ تعلیم کی اہمیت کا اندازہ اس بات سے لگایا جاسکتا ہے کہ تعلیم حاصل کرنا اسلام میں فرض قرار دیا گیا ہے۔ ضلع منڈی بہاوالدین کے لٹریسی ریٹ کو سو فیصد بنانے کے ٹارگٹ کو ہر صورت پورا کیا جائے گا۔ انہوں نے کہا کہ لٹریسی ڈیپارٹمنٹ کا بنیادی مقصد کسی بھی وجہ سے پرائمری سطح سکول کو چھوڑ جانے والے بچوں کو دوبارہ زیور تعلیم سے آراستہ کرنا ہے تاکہ وہ بھی معاشرے کا بہترین شہری بن سکیں اور ملک میں اپنا بہتر کردار ادا کر سکیں۔
سی ای او ایجوکیشن محمد یاسین ورک نے خطاب کرتے ہوئے کہا کہ لٹریسی ڈیپارٹمنٹ بچوں کو تعلیم کی روشنی سے منور کررہا ہے ، ان بچوں کو فری کتابیں،کاپیاں، پنسل ،سلیٹ، سلیٹیاں اور دیگر سکول کِٹ مہیا کئے جانے کے ساتھ ساتھ ان کے سلیبس پر بھی خصوصی توجہ دی جاتی ہے اور عام تعلیمی سال سے بھی زیادہ تیزی سے ان بچوں کو تعلیم مہیا کی جاتی ہے۔
ڈسٹرکٹ ایجوکیشن آفیسر لٹریسی محمد عمر عبداللہ نے بتایا کہ ضلع منڈی بہاوالدین میں اس وقت 277 لٹریسی سنٹرز کام کر رہے ہیں جن میں 8 ہزار 310 طلباءو طالبات زیر تعلیم ہیں۔انہوں نے بتایا کہ لٹریسی ڈیپارٹمنٹ ایسے دور دراز علاقوںاور ڈیرہ جات پر جہاں پر تعلیمی سہولیات موجود نہیں ہیں یا ناکافی ہیں،
وہاں پر بچوں کیلئے تعلیمی مواقع فراہم کر رہا ہے اور اپنے محدود وسائل میں احسن طریقے سے اپنے فرائض سر انجام دے رہا ہے ۔تقریب کے اختتام پر محکمہ لٹریسی میں بہترین کارکردگی کا مظاہرہ کرنے والے لٹریسی افسران، ٹیچرز اور ملازمین میں تعریفی سرٹیفکیٹ بھی تقسیم کئے گئے ۔