حکومت پنجاب کی ہدایت پر ضلع منڈی بہاوالدین کے عوام الناس کو مہنگائی سے ریلیف مہیا کرنے اور پٹرولیم مصنوعات کی قیمتوں میں کمی کے مثبت ثمرات نچلے طبقے تک منتقل کرنے کے حوالے سے ڈپٹی کمشنر شاہد عمران مارتھ کی زیرصدارت اجلاس میں اشیائے خوردونوش کی نئی قیمتیں مقرر، تمام اشیائے خوردونوش کی قیمتوں میں کمی کا نوٹیفکیشن جاری کردیاگیا۔
منڈی بہاوالدین ( ایم.بی.ڈین نیوز 06 جون 2023) نوٹیفیکیشن کے مطابق چاول باسمتی سپر 300 روپے فی کلو گرام، دال چنا (موٹی)210، باریک 200، دال مسور 235، دال ماش دھلی ہوئی 435، دال ماش چھلکا 410، دال مونگ 210 روپے، سیاہ چنا 210، سفید چنا 320، بیسن 210، چینی 113 روپے کلو، روٹی(100گرام) 15روپے، سادہ نان (120 گرام) 20 روپے، چھوٹاگوشت 1،350، بڑاگوشت 700، دودھ فی لیٹر 130 روپے، دہی140 روپے جبکہ گوشت برائیلر، انڈے،سبزی و پھل وغیرہ کے نرخ مارکیٹ کمیٹی کے جاری کردہ ہوں گے۔
تازہ ترین پھل، سبزی و مرغ کے نرخ جانئیے
اجلاس سے خطاب کرتے ہوئے ڈپٹی کمشنر شاہد عمران مارتھ نے کہا کہ نئی قیمتوں کا تعین تاجر برادری اور سول سوسائٹی کے نمائندوں کی مشاورت، او پن وہول سیل مارکیٹ اور دیگر اضلاع میں رائج قیمتوں کو مدنظر رکھتے ہوئے کیا گیا ہے تاکہ ناجائز منافع خوری کی روک تھام یقینی بنا کر صارفین کو ریلیف فراہم کیا جاسکے۔ انہوں نے کہا کہ ضلعی پرائس کنٹرول کمیٹی کی مقرر کردہ قیمتوں پر نفاذ اور ان پر عملدرآمد یقینی بنایا جائے گا، تاجر برادری اس سلسلہ میں ضلعی و تحصیل انتظامیہ سے تعاون کریں۔
انہوں نے مزید کہا کہ ناجائز منافع خوری قطعاً برداشت نہیں کی جائے گی، تاجر تنظیمیں اور تاجر رہنماء کمیٹی کے فیصلوں کو نچلی سطح پر منتقل کریں اور اس با ت کو یقینی بنایا جائے کہ ریٹ لسٹیں نمایاں جگہ پر آویزاں کی جائیں۔اجلاس میں اسسٹنٹ کمشنر ہیڈ کواٹر وحید حسن، ڈی او انڈسٹریزرانا محمد سعید، تاجرتنظیموں کے عہدیداران اور متعلقہ محکموں کے افسران شریک تھے۔