پاکستان نے سندھ طاس معاہدے کی معطلی کے معاملے پر بھارت کے خطوط کا جواب دیتے ہوئے واضح کیا ہے کہ وہ اپنے حقوق کے تحفظ کے لیے ہر فورم پر آواز اٹھائے گا۔
دفتر خارجہ کے ترجمان شفقت علی خان نے اپنے بیان میں کہا کہ پاکستان نے سندھ طاس معاہدے پر بھارت کے خطوط کا جواب دیا ہے۔ یہ معاہدہ مکمل طور پر قابل نفاذ اور فریقین پر پابند ہے۔
انہوں نے کہا کہ معاہدے کے تحت سندھ طاس کو معطل کرنے کی کوئی گنجائش نہیں ہے۔ پاکستان نے واضح کیا ہے کہ معاہدے کی خلاف ورزی ناقابل قبول ہو گی۔
ترجمان دفتر خارجہ نے کہا کہ سندھ طاس معاہدہ ایک بین الاقوامی ذمہ داری ہے جس کا احترام کیا جانا چاہیے۔ پاکستان معاہدے کے تحت اپنے حقوق کے تحفظ کے لیے ہر فورم پر آواز اٹھائے گا۔