شہر بھر سے ناجائز رکشہ اسٹینڈز کا خاتمہ، غلہ منڈی کے قریب رکشہ اسٹینڈ قائم کردیا گیا

منڈی بہاوالدین ( ایم.بی.ڈین نیوز 15 ستمبر 2022)ٹریفک پولیس اور میونسپل انتظامیہ کا تجاوزات کے خلاف بڑا اقدام، شہر بھر سے ناجائز رکشہ اسٹینڈز کا خاتمہ، غلہ منڈی کے قریب رکشہ اسٹینڈ قائم کردیا گیا۔

تفصیلات کے مطابق ڈی ایس پی ٹریفک پولیس منڈی بہاءالدین طارق شفیع نے شہر میں ٹریفک کے نظام کو معمول پر رکھنے کے لیے موثر پلاننگ مرتب کرکے عملدرآمد شروع کردیا ہے، ٹریفک پولیس نے ڈی ایس پی طارق شفیع کی زیر نگرانی کمیٹی چوک، صدر چوک سمیت مختلف مقامات پر ٹریفک کی روانی میں خلل کا باعث بننے والے ناجائز رکشہ اسٹینڈز کو ختم کرکے غلہ منڈی چوک پر باقاعدہ رکشہ اسٹینڈ قائم کردیا

جہاں میونسپل کمیٹی کی طرف سے رکشہ ڈرائیورز کی سہولت کے لیے اقدامات عمل میں لائے جارہے ہیں ، چوک کے اطراف میں ناجائز تجاوزات کو ہٹوا کر تجاوزات کے مرتکب افراد کو آئندہ کے لئے وارننگ بھی جاری کردی گئی۔ اس موقع پر ڈی ایس پی ٹریفک پولیس طارق شفیع کا کہنا تھا کہ شہری سہولیات کی فراہمی اور ٹریفک کا نظام معمول پر رکھنے کے لئے ہر شخص کو اپنا کردار ادا کرنا ہوگا،

انہوں نے کہا کہ بازاروں میں تجاوزات سے گریز اور بے قاعدہ پارکنگ کی روش ترک کرکے شہر کو خوبصورت اور مسائل سے پاک کرنا ہم سب کی زمہ داری ہے.