ریجنل ایمرجنسی آفیسر گوجرنوالہ ڈویژن سید کمال عابد نے آڈٹ ٹیم کے ہمراہ سینٹرل اسٹیشن ریسکیو 1122 منڈی بہاﺅالدین کا دورہ کیا۔ انہوں نے ریسکیو 1122 کی گاڑیوں، بلڈنگ، صفائی ستھرائی اور سٹاف کے ٹرن آﺅٹ کا تفصیلی معائنہ کیا ۔ انہوں نے سٹور، اکاﺅنٹس اور رپیئر اینڈ مینٹی نینس کا آڈٹ کیا۔
منڈی بہاﺅالدین ( ایم.بی.ڈین نیوز 06 اکتوبر 2022 ) اس موقع پر ریجنل ایمرجنسی آفیسر سید کمال عابدنے کہا کہ ان کے دورے کا بنیادی مقصد ریسکیو اسٹیشن کی استعداد کار کو جانچنا اور دستیاب وسائل سے آگاہی حاصل کرنا ہے ۔ ضلعی ایمرجنسی آفیسر انجینئر عمران خان نے ریسکیو 1122 کی کارکردگی کی رپورٹ پیش کی اور دستیاب وسائل پر تفصیلی بریفنگ دی جس پر ریجنل ایمرجنسی آفیسر سید کمال عابدنے ضلعی ایمرجنسی آفیسر انجینئر عمران خان سمیت تما م ریسکیو اسٹاف کی انتھک محنت و لگن کو سراہا اورمستقبل میں بھی اسی جوش و جذبہ کے ساتھ لوگوں کو ایمرجنسی کی سروس فراہم کرنے کی ہدایت کی۔
انہوں نے بہترین کارکردگی پر ڈسٹرکٹ ایمرجنسی آفیسر انجینئر عمران خان اور افسران سمیت سٹاف کی تعرےف کی۔ بعد ازاں انہوں نے ریسکیو 1122اور غیاث ہسپتال منڈی بہاوالدین کے مابین علاج معالجہ میں تعاون معاہدہ کے ایم او یو پر دستخط کئے ۔ اس موقع پر ریجنل ایمرجنسی آفیسر نے بتایا کہ مفاہمتی یادداشت کے مطابق ریسکیو 1122کے افسران، جوانوں اور ان کی فیملی کو ڈاکٹرز فیس ، وزیٹر کنسلٹیشن فیس ، ایکس رے، الٹرا ساﺅنڈ، اینڈوسکوپی، ای آر سی پی، آپریشن، میڈیسن،اور ایڈمٹ فیس 20 سے 50 فیصد تک خصوصی رعائت دی جائے گی۔
اس موقع پر مینجنگ ڈائریکٹر نے کہاکہ غیاث ہسپتال ریسکیو 1122 کی پیشہ ورانہ خدمات کا اعتراف کرتا ہے ، یہ فورس اپنی ایمانداری، جذبہ حب الوطنی، پیشہ ورانہ مہارت، دکھی انسانیت کی خدمت، حادثات کے شکار لوگوں کی بروقت مدد اور ان کے ساتھ اچھے اخلاق اوربرتاﺅ کی وجہ سے نہ صرف پاکستان بلکہ سارک ممالک کے لئے ایک مثال ہے اور پوری دنیا میں اپنی ایک منفرد پہچان رکھتی ہے۔
یادداشت کا یہ معاہدہ ریسکیو 1122 کی خدمات کے اعتراف میں کیا گیا ہے ہماری کوشش ہو گی کہ ریسکیو 1122 کے افسران و جوانوں کے بچوں و دیگر فیملی ممبران کوزیادہ سے زیادہ طبی سہولیات فراہم کی جائیں۔