پاکستان اوورسیز فورم اور پاکستان پبلک ہیلپ فاونڈیشن کے زیر اہتمام امن ریلی کا انعقاد کیا گیا جس کی قیادت اوورسیز فورم کے صدر شاہد رضا رانجھا آف امریکہ، چیئرمین پاکستان پبلک ہیلپ فائونڈیشن ناصر عباس تارڑ، اعجاز بابر ساہی، طارق جاوید گوندل، میاں وقار اکمل، عبدالرئوف گوندل، ہمایوں وڑائچ، چیمبر آف کامرس اینڈ انڈسٹری کے صدر سید حیدر رضا رضوی اور دیگر رہنمائوں نے کی۔
ریلی جامع مسجد مدنی ڈاکخانہ روڈ سے شروع ہو کر کالج چوک، کچہری روڈ، صدر بازار سے ہوتی ہوئی پریس کلب کے باہر ریلی کی شکل اختیار کر گئی۔ اس موقع پر مقررین نے کہا کہ منڈی بہاؤالدین کو پرامن ضلع دیکھنا چاہتے ہیں، معمولی باتوں پر انسانی جانوں کا ضیاع معاشرے کے لیے لمحہ فکریہ ہے۔
اس خونریزی کو روکنے کے لیے کمیونٹی کو آگے آنا چاہیے۔ ہمیں نفرتوں کو ختم کرکے بھائی چارے کی فضا کو فروغ دینا ہوگا۔ انہوں نے کہا کہ بیرون ملک مقیم پاکستانیوں کے دل اپنی مٹی سے جڑے ہوئے ہیں۔ دیرینہ دشمنی اور ناراضگی کو ختم کرنے کے لیے آگے بڑھ کر کردار ادا کرنا ہوگا۔