ڈپٹی کمشنر محمد شاہد نے کہا ہے کہ وزیراعظم عمران خان اور وزیراعلیٰ پنجاب سردار عثمان بزدار کی واضح ہدایات کی روشنی میں تمام اشیائے خوردونوش بالخصوص آٹا، چینی ، دالیں، پھلوں، سبزیوں کے مقرر کردہ نرخوں پر عملدرآمد کیلئے تمام ممکنہ اقدامات کو یقینی بنانا ضلعی انتظامیہ کی اولین ترجیح ہے، انہوں نے کہا کہ پرائس کنٹرول مجسٹریٹس صاحبان عادی گراں فروشوں، ذخیرہ اندوزوں اور ناجائز منافع خوروں کو جرمانے کرنے کی بجائے جیل بھجوائیں۔
منڈی بہاﺅلدین ( ایم.بی.ڈین نیوز 24 دسمبر 2021) ان خیالات کااظہار انہوں نے ڈی سی آفس میں پرائس مجسٹریٹس کی کارکردگی کے حوالے سے پرائس کنٹرول کمیٹی کے اجلاس کی صدارت کرتے ہوئے کیا ۔ اجلاس میں ایڈیشنل ڈپٹی کمشنر ریونیو ڈاکٹر احسان الحق ضیاء، اسسٹنٹ کمشنر منڈی بہاﺅالدین کاشف جلیل، اسسٹنٹ کمشنر پھالیہ محمد عرفان ہنجرا، ایڈیشنل ڈائریکٹر لائیو سٹاک ڈاکٹر محمد ممتاز بیگ، ڈپٹی ڈائریکٹر زراعت شیخ محمد اقبال، اسسٹنٹ ڈائریکٹر سید اعجاز حسین نقوی، ڈی او انڈسٹریز رانامحمد سعید کے علاوہ مجسٹریٹس صاحبان اور متعلقہ محکموں کے افسران بھی موجود تھے۔
قبل ازیں ملٹی میڈیا کے ذریعے اجلاس کو بریفنگ دیتے ہوئے بتایا گیا کہ یکم دسمبر سے لے کر اب تک مجسٹریٹس صاحبان نے 15 ہزار 77 انسپکشنز کیں اور پرائس ایکٹ کی380 خلاف ورزیاں پائے جانے پرمختلف دکانداروں ، بڑے سٹوروں اور سٹاکسٹ کو 13 لاکھ 30 ہزار 600 روپے جرمانے کئے گئے۔ 9افراد کے خلاف ایف آئی آر درج کر وا کر6 افراد کو گرفتار کروا دیا گیا۔
جس پر ڈپٹی کمشنر محمد شاہد نے پرائس مجسٹریٹس صاحبان کو واضح ہدایت جاری کرتے ہوئے کہا کہ حکومت ضروری اشیائے خوردونوش، پھلوں ، سبزیوں کی قیمتوں میں استحکام لانے کیلئے پوری طرح سنجیدہ ہے اور موجودہ حالات میں اشیائے ضروریہ کی قیمتوں کو عوام الناس کی قوت خرید کے مطابق کرنے کیلئے تمام وسائل بروئے کار لا رہی ہے۔
آج کی تازہ ترین ریٹ لسٹ دیکھیں
انہوں نے پرائس مجسٹریٹ کو ہدایت کی کہ گراں فروشوں کے خلاف بلا تفریق آپریشن کیا جائے ، عام بازاروں اور مارکیٹوں میں اشیاء ضروریہ کی ریٹ لسٹ اور ریٹ بورڈ کو نمایاں جگہوں پر آویزاں کروائیں اور جو دکاندار اس پر عملدرآمد نہ کرے اس کے خلاف سخت کارروائی عمل میں لائی جائے۔ انہوں نے پرائس مجسٹریٹ صاحبان کو ہدایت کی کہ وہ اپنی کارکردگی بہتر بنائیں کیونکہ ان کی حقیقی کارکردگی اشیاءخوردونوش کی قیمتوں کو کنٹرول میں رکھ کر عوام الناس کو فائدہ پہنچانا ہے ۔محمد شاہد نے کہا کہ ہمیں حکومتی ہدایت کو سنجیدگی سے لے کر اس پر سو فیصدکارکردگی دکھانا ہوگی۔