ڈپٹی کمشنر محمد شاہد نے کہا ہے کہ رمضان المبارک میں اشیائے خوردونوش کی قیمتوں میں استحکام کو سو فیصد یقینی بنایا جائے گا، انجمن تاجران و کریانہ مرچنٹس ضلعی انتظامیہ کے ساتھ مل کر حکومت کی جانب سے اشیاء خوردونوش کی قیمتوں کو موثر بنانے کیلئے اپنا تعاون اور کلیدی کردار ادا کریں۔
منڈی بہاوالدین ( ایم.بی.ڈین نیوز 29 مارچ 2022) ان خیالات کا اظہار انہوں نے ڈپٹی کمشنر آفس میں ڈسٹرکٹ پرائس کنٹرول کمیٹی کے اجلاس میں انجمن تاجران و کریانہ مرچنٹس کے نمائندگان کے ساتھ اشیائے خوردونوش کی قیمتوں کا تعین کرنے کے حوالے سے منعقدہ جائزہ اجلاس کی صدارت کرتے ہوئے کیا۔
اجلاس میں ایڈیشنل ڈائریکٹر لائیو سٹاک ڈاکٹر محمد ممتاز بیگ، ڈی او انڈسٹریز و فوکل پرسن رانا محمد سعید، سیکرٹری مارکیٹ کمیٹی، انجمن تاجران و کریانہ مرچنٹس کے عہدیداروں سمیت دیگر متعلقہ محکموں کے افسران بھی شریک تھے۔ قبل ازیں ڈی او انڈسٹریز رانا محمد سعید نے اجلاس کو مختلف اضلاع میں موجودہ اشیاءخوردونوش کی قیمتوں کے حوالے سے بریفنگ دی۔جس پر ڈپٹی کمشنر نے تاجران اور متعلقہ افسران کے ساتھ غوروخوص کے بعد متفقہ طور پراشیائے خوردونوش کی قیمتیں مارکیٹس کے جائزے کے بعد مقرر کر دیں۔
جس کے مطابق آٹا 10کلو بیگ 450 روپے، باسمتی سپر کرنل 130 روپے کلو، دال چناموٹی147 روپے، دال چنا باریک 140 روپے، دال ماش چھلکا والی 225روپے کلو ، دال مونگ دھلی ہوئی 135 روپے کلو، دال مسور موٹی 200 روپے، دال مسور باریک 225 روپے کلو، بیسن146 روپے کلو، سفید چنا کینیڈین 220 روپے، سفید چنا باریک 190 روپے، کالا چنا 145 روپے، چینی 85 روپے فی کلو گرام پر دستیاب ہوں گے ۔
چھوٹا گوشت 950 روپے کلو جبکہ بڑا گوشت 500 روپے کلوپر دستیاب ہوگا۔ اسی طرح دودھ 90 روپے لیٹر اور دہی 100 روپے فی کلو گرام پر دستیاب ہوں گے۔ تندوری روٹی100 گرام 7روپے فی عدد، نان 12 روپے فی عدد پر دستیاب ہونگے جبکہ بقیہ اشیائے خوردونوش کی قیمتیں پہلی قیمت پر ہی برقرار رکھنے کا فیصلہ کیا گیا۔سبزیوں، فروٹ ، انڈے ، برائلر گوشت مارکیٹ کمیٹی روزانہ کی بنیاد پر مقرر کرے گی۔گھی اور آئل کنٹرولڈ پرنٹڈ ریٹس پر دستیاب ہوں گے۔
پھل، سبزی و گوشت کی تازہ ترین ریٹ لسٹ دیکھیں
قبل ازیں ڈپٹی کمشنر نے پرائس کنٹرول مجسٹریٹس کے اجلاس سے خطاب کرتے ہوئے کہاکہ پرائس مجسٹریٹس اپنی کارکردگی کو مزید بہتر بنائیں ۔ انہوں نے کہاکہ ماہ رمضان میں ضلعی انتظامیہ ضروری اشیاء خوردونوش، پھلوں ، سبزیوں کی قیمتوں میں استحکام لانے کیلئے پوری طرح سنجیدہ ہے اورموجودہ حالات میں عوام الناس کو ریلیف پہنچانے کیلئے تمام وسائل بروئے کار لا رہی ہے۔
انہوں نے ہدایت کی کہ کسی غریب اور چھوٹے دکاندار کو ناجائز تنگ نہ کیا جائے بلکہ صریحاََ خلاف ورزی کے مرتکب افراد کے خلاف کاروائی کی جائے۔ مزید ان کا کہنا تھا کہ اشیائے خوردونوش میں ملاوٹ کسی صورت برداشت نہ کی جائے گی ، ایسے عناصر کے خلاف ایکشن لیتے ہوئے انہیں بھاری جرمانوں کے علاوہ جیل بھی بھیجا جائے گا ۔
