منڈی بہاءالدین ( ایم۔بی۔ڈین نیوز 05 اکتوبر 2025 ) وزیراعلی پنجاب مریم نوازشریف کی ہدایت پر حالیہ سیلاب کے دوران تحصیل پھالیہ کے جاں بحق ہونے والے افراد کی فیملیز میں امدادی چیکس کی تقسیم کا سلسلہ شروع کر دیا گیا۔
ممبر صوبائی اسمبلی خالد محمود رانجھا اور اسسٹنٹ کمشنر پھالیہ وحید حسن گوندل نے سیدا شریف اور بھیکھو کے سیلاب سے جاں بحق ہونے والے افراد کے لواحقین میں ان کی گھر کی دہلیز پر جا کر 10،10 لاکھ روپے کے چیکس تقسیم کئے۔
ممبر صوبائی اسمبلی خالد محمود رانجھا اور اسسٹنٹ کمشنر پھالیہ وحید حسن گوندل کا کہنا تھا کہ وزیراعلی پنجاب مریم نواز شریف کی ہدایت پر صاف شفاف انداز میں ڈیٹا مرتب کر کے سیلاب متاثرین میں چیکس تقسیم کئے جا رہے ہیں۔ ان کا کہنا تھا کہ ضلعی انتظامیہ متاثرہ خاندانوں کے ساتھ کھڑی ہے۔ یہ معاوضہ انسانی جانوں کا نعم البدل ہر گز نہیں ہے مگر متاثرہ خاندانوں کو یہ احساس دلانا ہے کہ حکومت پنجاب آپ کے دکھ درد میں برابر کے شریک ہیں۔
اس موقع پر سیلاب متاثرین کا کہنا تھا کہ ہم وزیراعلی پنجاب مریم نوازشریف کے بے حد مشکور ہیں کہ متاثرہ خاندانوں کے دکھ درد کو محسوس کرتے ہوئے مالی امداد فراہم کی۔