ایڈیشنل ڈپٹی کمشنر ریونیو ذوالفقار احمد نے کہا ہے کہ اشیائے خوردونوش کی قیمتوں میں استحکام کو سوفیصد یقینی بنایا جائے گا، انجمن تاجران و کریانہ مرچنٹس ضلعی انتظامیہ کے ساتھ مل کر حکومت کی جانب سے اشیائے خوردونوش کی قیمتوں کو موثر بنانے کیلئے اپنا تعاون اور کلیدی کردار ادا کریں۔
منڈی بہاوالدین( ایم.بی.ڈین نیوز 06 اگست 2023) ان خیالات کا اظہار انہوں نے ڈپٹی کمشنر آفس میں انجمن تاجران و کریانہ مرچنٹس کے نمائندگان کے ساتھ اشیائے خوردونوش کی قیمتوں کا تعین کرنے کے حوالے سے منعقدہ اجلاس کی صدارت کرتے ہوئے کیا۔
اجلاس میں ڈپٹی ڈائریکٹر لوکل گورنمنٹ رضوان بشیر آغا،ڈی او انڈسٹریز و فوکل پرسن رانا محمد سعید، ڈپٹی ڈائریکٹر لائیو سٹاک پھالیہ، سیکرٹری مارکیٹ کمیٹی، انجمن تاجران و کریانہ مرچنٹس کے عہدیداروں سمیت دیگر متعلقہ محکموں کے افسران بھی شریک تھے۔
قبل ازیں ڈی او انڈسٹریز رانا محمد سعید نے اجلاس کو مختلف اضلاع میں موجودہ اشیائے خوردونوش کی قیمتوں کے حوالے سے بریفنگ دی۔جس پر ایڈیشنل ڈپٹی کمشنر نے تاجران اور متعلقہ افسران کے ساتھ غوروخوص کے بعد متفقہ طور پر اشیائے خوردونوش کی قیمتیں مارکیٹس کے جائزے کے بعد مقرر کر کے نوٹیفکیشن جاری کر دیا۔
نوٹیفکیشن کے مطابق باسمتی سپر نیا 310 روپے کلو،دال چناموٹی 210 روپے، دال چنا باریک200 روپے، دال ماش دھلی ہوئی 485 روپے، دال ماش چھلکا 455روپے کلو، دال مونگ دھلی ہوئی 220 روپے کلو، دال مسور موٹی 245 روپے، بیسن205 روپے کلو، سفید چنا باریک کینیڈین 325 روپے، کالا چنا 205 روپے فی کلو گرام پر دستیاب ہوں گے۔
چھوٹا گوشت(مٹن)1350روپے کلو جبکہ بڑا گوشت (بیف) 700روپے کلو پر دستیاب ہوگا۔ اسی طرح دودھ 130 روپے لیٹر اور دہی 140 روپے فی کلو گرام پر دستیاب ہوں گے جبکہ بقیہ اشیائے خوردونوش کی قیمتیں پہلی قیمت پر ہی برقرار رکھنے کا فیصلہ کیا گیا۔سبزیوں، فروٹ ، انڈے ، برائلر گوشت مارکیٹ کمیٹی روزانہ کی بنیاد پر مقرر کرے گی۔گھی اور آئل کنٹرولڈ پرنٹڈ ریٹس پر دستیاب ہوں گے۔
ایڈیشنل ڈپٹی کمشنر نے کہاکہ نئی قیمتوں کا تعین تاجر برادری اور سول سوسائٹی کے نمائندوں کی مشاورت، او پن وہول سیل مارکیٹ اور دیگر اضلاع میں رائج قیمتوں کو مدنظر رکھتے ہوئے کیا گیا ہے تاکہ ناجائز منافع خوری کی روک تھام یقینی بنا کر صارفین کو ریلیف فراہم کیا جاسکے۔ انہوں نے کہا کہ ضلعی پرائس کنٹرول کمیٹی کی مقرر کردہ قیمتوں پر نفاذ اور ان پر عملدرآمد یقینی بنایا جائے گا، تاجر برادری اس سلسلہ میں ضلعی و تحصیل انتظامیہ سے تعاون کریں اور ناجائز منافع خوری اور ذخیرہ اندوزی سے اجتناب کریں۔
انہوں نے کہا کہ ضلعی انتظامیہ ضروری اشیائے خوردونوش کی قیمتوں میں استحکام لانے کیلئے پوری طرح سنجیدہ ہے اورموجودہ حالات میں عوام الناس کو ریلیف پہنچانے کیلئے تمام وسائل بروئے کار لا رہی ہے۔ انہوں نے مزید کہا کہ ناجائز منافع خوری قطعاً برداشت نہیں کی جائے گی، تاجر تنظیمیں اور تاجر رہنماء کمیٹی کے فیصلوں کو نچلی سطح پر منتقل کریں اور اس با ت کو یقینی بنایا جائے کہ ریٹ لسٹیں اور ریٹ بورڈ کو نمایاں جگہ پر آویزاں کی جائیں، جو دکاندار اس پر عملدرآمد نہ کرے اس کے خلاف سخت کارروائی عمل میں لائی جائے گی۔