ڈپٹی کمشنر شاہد عمران مارتھ کی زیر صدارت گزشتہ انسداد پولیو مہم کی کارکردگی کے حوالے سے ڈسٹرکٹ پولیو ایریڈیکیشن کمیٹی کااجلاس منعقد ہوا۔ اجلاس میں سی ای او ہیلتھ ڈاکٹر محمد عابد یوسف، ڈسٹرکٹ ہیلتھ آفیسر، فوکل پرسن برائے ای پی آئی /پولیو رافعہ ناہید سمیت دیگر متعلقہ محکموں کے افسران بھی موجود تھے۔
منڈی بہاوالدین ( ایم.بی.ڈین نیوز 09 مارچ 2024)سی ای او ہیلتھ ڈاکٹر عابد یوسف نے اجلاس کو گزشتہ انسداد پولیو مہم کی کارکردگی کے حوالے سے بتایا کہ ضلع منڈی بہاوالدین میں26 فروری سے یکم مارچ 2024 تک جاری رہنے والی انسداد پولیو مہم میں مجموعی طور پر3 لاکھ 26 ہزار 401 بچوں کو پولیو ویکسین کے قطرے پلائے گئے ،جس کی ٹارگٹ کے حساب سے کوریج تقریباً 100.55 فیصد رہی۔
ڈپٹی کمشنر شاہد عمران مارتھ نے کہا کہ پولیو مہم کے دوران محکمہ صحت کی ٹیموں نے اپنی پیشہ وارانہ صلاحیتوں کو بروئے کار لاتے ہوئے ٹارگٹس کے حصول کو ممکن بنایا۔ڈپٹی کمشنر نے انسداد پولیو مہم کے دوران بہترین کارکردگی پرافسران سمیت پوری ٹیم کو شاباش دی اور بہترین کارکردگی دیکھانے والے پولیو ورکز میں تعریفی سرٹیفکیٹ تقسیم کئے۔ انہوں نے پولیو مہم کے دوران ڈیوٹی میں غفلت برتنے والے ملازمین کے خلاف تادیبی کاروائی کرنے کی بھی ہدایت کی۔