ڈپٹی کمشنر عثمان خالد خان نے کہا ہے کہ وزیراعظم پاکستان محمد شہباز شریف اور وزیراعلیٰ پنجاب محمد حمزہ شہباز کی واضح ہدایات کی روشنی میں اشیائے خوردونوش کی قیمتوں میں استحکام کو سو فیصد یقینی بنایا جا رہا ہے، انجمن تاجران و کریانہ مرچنٹس ضلعی انتظامیہ کے ساتھ مل کر حکومت کی جانب سے اشیاء خوردونوش کی قیمتوں کو موثر بنانے کیلئے اپنا تعاون اور کلیدی کردار ادا کریں۔
منڈی بہاﺅالدین(ایم.بی.ڈین نیوز 20جولائی2022 ) ان خیالات کا اظہار انہوں نے ڈپٹی کمشنر آفس میں ڈسٹرکٹ پرائس کنٹرول کمیٹی کے اجلاس میں انجمن تاجران و کریانہ مرچنٹس کے نمائندگان کے ساتھ اشیائے خوردونوش کی قیمتوں کا تعین کرنے کے حوالے سے منعقدہ جائزہ اجلاس کی صدارت کرتے ہوئے کیا۔
اجلاس میں ڈپٹی ڈائریکٹر لائیو سٹاک ڈاکٹر ضیاءاللہ گوندل ، ڈی او انڈسٹریز و فوکل پرسن رانا محمد سعید، انسپکٹر محمد بلال، سیکرٹری مارکیٹ کمیٹی، انجمن تاجران و کریانہ مرچنٹس کے عہدیداروں سمیت دیگر متعلقہ محکموں کے افسران بھی شریک تھے۔
قبل ازیں ڈی او انڈسٹریز و فوکل پرسن رانا محمد سعید نے اجلاس کو مختلف اضلاع میں موجودہ اشیائے خوردونوش کی قیمتوں کے حوالے سے بریفنگ دی۔ جس پر ڈپٹی کمشنر نے تاجران اور متعلقہ افسران کے ساتھ غوروخوص کے بعد متفقہ طور پراشیائے خوردونوش کی قیمتیں مارکیٹس کے جائزے کے بعد مقرر کر دیں۔
جس کے مطابق آٹا 20 کلو بیگ 980 روپے جبکہ 10کلو بیگ490 روپے، باسمتی سپر نیا 220 روپے کلو، دال چنا موٹی210 روپے، دال چنا باریک205 روپے، دال مسور (باریک)300 روپے، دال مسور (موٹی ) 285 روپے کلو، دال ماش دھلی ہوئی 325 روپے، دال ماش چھلکا والی 285 روپے کلو ،دال مونگ دھلی ہوئی 170 روپے، سیاہ چنا 200 روپے،سفید چناباریک (کینیڈا) 265 روپے، بیسن 200 روپے کلو، چینی 85روپے فی کلو گرام پر دستیاب ہوں گے ۔
اسی طرح چھوٹا گوشت)مٹن) 1100روپے کلو جبکہ بڑا گوشت)بیف) 550کلو پر دستیاب ہوگا۔ اسی طرح دودھ 110 روپے فی لیٹر اور دہی120 فی کلو گرام پر دستیاب ہوں گے۔ تندوری روٹی100)گرام ) 10روپے فی عدد، نان 120) گرام ) 15روپے فی عدد پر دستیاب ہونگے جبکہ بقیہ اشیائے خوردونوش کی قیمتیں پہلی قیمت پر ہی برقرار رکھنے کا فیصلہ کیا گیا۔
منڈی بہائوالدین میں آج پھل، سبزی و گوشت کی تازہ ترین ریٹ لسٹ دیکھیں
سبزیوں، فروٹ ، انڈے ، برائلر گوشت مارکیٹ کمیٹی روزنامہ کی بنیاد پر مقرر کرے گی۔ ڈپٹی کمشنر عثمان خالد خان نے کہا کہ حکومت ضروری اشیاء خوردونوش، پھلوں ، سبزیوں کی قیمتوں میں استحکام لانے کیلئے پوری طرح سنجیدہ ہے اورموجودہ حالات میں عوام الناس کو ریلیف پہنچانے کیلئے تمام وسائل بروئے کار لا رہی ہے۔
انہوں نے ہدایت کی کہ کسی غریب اور چھوٹے دکاندار کو ناجائز تنگ نہ کیا جائے بلکہ صریحاََ خلاف ورزی کے مرتکب افراد کے خلاف کاروائی کی جائے۔انہوں نے وارننگ جاری کرتے ہوئے کہا کہ اشیائے خوردونوش میں ملاوٹ کسی صورت برداشت نہ کی جائے گی بلکہ ایسے عناصر کے خلاف ایکشن لیتے ہوئے انہیں بھاری جرمانوں کے علاوہ جیل کی سزا بھی دی جائے گی۔