پنجاب کے بیشتر اضلاع میں ان دنوں شدید گرمی پڑ رہی ہے جہاں آنے والے دنوں میں بارشوں کی پیشگوئی کی گئی ہے۔
ترجمان پنجاب ڈیزاسٹر مینجمنٹ اتھارٹی کے مطابق پنجاب کے بیشتر اضلاع میں موسم گرم اور مرطوب رہے گا۔ جبکہ صوبے میں 13 سے 16 اگست تک مون سون بارشوں کے امکانات ہیں۔
ترجمان پی ڈی ایم اے کے مطابق سیالکوٹ، نارووال، شکر گڑھ، لاہور، گوجرانوالہ، گجرات، منڈی بہاؤالدین میں موسلادھار بارش کا امکان ہے۔ جبکہ راولپنڈی، اٹک، جہلم، چکوال، مری اور گلیات میں گرج چمک کے ساتھ بارش کا امکان ظاہر کیا گیا ہے۔
دوسری جانب دریاؤں کی صورتحال پر ترجمان کا کہنا ہے کہ پنجاب کے دریاؤں چناب، راوی، جہلم اور ستلج میں پانی کا بہاؤ معمول پر ہے۔ دریائے سندھ میں تونسہ اور تربیلا کے مقام پر نچلے درجے کا سیلاب ہے اور منگلا ڈیم 95 فیصد بھر چکے ہیں۔