ڈپٹی کمشنر طارق علی بسرا نے کہا ہے کہ پاکستان جیسا عظیم وطن حاصل کرنے کیلئے طویل جدوجہد اور لازوال قربانیاں دینا پڑیں۔ ہم سب کو مل کر اپنی اپنی فیلڈ میں بہتر سے بہترین طریقے سے فرائض سرانجام دینے کی ضرورت ہے تاکہ ہم ملکی ترقی میں اپنا کردار ادا کر سکیں.
منڈی بہاﺅالدین(ایم.بی.ڈین نیوز 14اگست2021 ) انہوں نے کہاکہ14 اگست اہم ترین دن ہے، آج کے دن ہمیں یہ عہد کرنا ہے کہ اپنے اسلاف کے دئےے ہوئے اس ملک کیلئے کسی بھی قسم کی قربانی سے دریغ نہیں کرینگے اور اس کی سلامتی اور تحفظ کیلئے اپنے خون کا ایک ایک قطرہ بہا دینگے۔
ان خیالات کا اظہار انہوں نے آج یہاں ڈسٹرکٹ کمپلیکس (ڈی سی آفس) میں یوم آزادی کی سادہ اور پر وقار تقریب میں پرچم کشائی کے بعد خطاب کرتے ہوئے کیا۔ تقریب کا با قاعدہ آغاز 8:55 پر سائرن سے کیا گیا جس کے بعد پرچم کشائی کی گئی اور قومی ترانہ احترام سے سنایا گیا۔
پولیس ، ریسکیو 1122 اور سکاﺅٹس طلباءکے دستوں کی جانب سے سلامی بھی پیش کی گئی۔اس موقع پرایم این اے حاجی امتیاز احمد چوہدری ، ڈی پی او ساجد حسین کھوکھر، ایڈیشنل ڈپٹی کمشنر ریونیو توقیر الیاس چیمہ، ایڈیشنل ڈپٹی کمشنر جنرل محمد شفیق، اسسٹنٹ کمشنر منڈی بہاﺅالدین امتیاز علی بیگ،سی ای اوہیلتھ ڈاکٹر محمد الیاس گوندل، سی ای او ایجوکیشن سید توقیر حسین شاہ سمیت دیگر تمام محکموں کے افسران ،معززین شہر، تاجربرادری، میدیا نمائندگان اور عوام الناس کی کثیر تعداد موجود تھی۔
ڈپٹی کمشنر اور ممبر قومی اسمبلی نے خطاب کرتے ہوئے کہا کہ آزادی ایک بہت بڑی نعمت ہے اور اس کا کوئی نعم البدل نہیں خدا کا لاکھ لاکھ شکر ہے کہ ہم آزاد وطن کی فضاوں میں سانس لے رہے ہیں۔ انہوں نے عوام الناس بالخصوص طلباء، اساتذہ اور تمام شعبہ زندگی سے تعلق رکھنے والوں سے اپیل کی کہ وہ انفرادی و اجتماعی کاوشوں سے وطن کو عظیم سے عظیم تر بنانے میں اپنا خصوصی کردار ادا کریں۔انہوں نے کہاکہ ہم سب پاکستان کے حصول اور ا س کے تحفظ اور استحکام کیلئے جانوں کے نظرانے پیش کرنے والوں کی شہادتوں کو سلام پیش کرتے ہیں۔ ڈپٹی کمشنر، ایم این اے اور ڈی پی او نے ڈی سی آفس کے احاطے میں کلین اینڈ گرین پاکستان مہم کے حوالے سے پودا بھی لگایا۔
بعد ازاں ڈپٹی کمشنر نے ڈی ایچ کیو ہسپتال کے مختلف وارڈز میں جا کر مریضوں کی عیادت کی، انہوںنے وہاں پر پر موجود مریضوں کو علاج معالجہ اور دیگر سہولیات کی فراہمی کا جائزہ لیا۔ انہوں نے مریضوں اور ان کے لواحقین میں کھانا ،مٹھائی اور گفٹس تقسیم کئے اور ان کی جلد صحت یابی کیلئے دعا بھی کی۔ ڈپٹی کمشنر طارق علی بسرا ڈسٹرکٹ جیل بھی گئے ۔ جیل میں یوم آزادی کے حوالے سے منعقدہ تقریب سے خطاب کرتے ہوئے کہا کہ ہمارے آباﺅ اجداد نے لاکھوں قربانیاں دے کر یہ ملک حاصل کیا۔ پاکستان کی آزادی کیلئے جہاں لاکھوں قربانیاں دی گئیں وہاں ملک کے تحفظ اور استحکام کیلئے بھی لاکھوں افراد قربان ہوئے۔ پاک فوج، پولیس اور شہریوں کی شہادتوں کو سلام پیش کرتے ہیں۔ ان شہادتوں کے نتیجے میں آج ملک پہلے سے بہتر ہے۔
انہوں نے کہا کہ آزادی کی قدر محکوم قوموں سے بہتر کوئی نہیں جانتا ۔انہوں نے کہا کہ قانون توڑنے پر جیل آنے والوں کو عہد کرنا ہوگا کہ وہ رہائی کے بعد اپنی زندگی اچھے انداز میں گزار کر قابل فخر شہری بنیں گے۔ تقریب کے اختتام پر ڈپٹی کمشنر ، ڈی پی او اور دیگر افسران نے اسیران میں سویٹس اور گفٹس بھی تقسیم کئے۔ اس موقع پر سپرنٹنڈنٹ جیل وحید خان، ڈپٹی سپرٹنڈنٹ جیل رانا شمشاد احمد خان، عمار احمد، معصب بلال گوندل، اسسٹنٹ سپرنٹنڈنٹ جیل عامر مچھرا سمیت جیل ملازمین اور اسیران بھی موجود تھے۔ اسی طرح تحصیل پھالیہ میں ساجد منیر کلیار اور ملکول میں عثمان غنی نے تقریب کی صدارت کی۔