منڈی بہاؤالدین: ڈائریکٹر جنرل پنجاب فوڈ اتھارٹی عاصم جاوید کی ہدایت پر ڈپٹی ڈائریکٹر آپریشنز پنجاب فوڈ اتھارٹی کی زیر نگرانی فوڈ سیفٹی ٹیم نے ضلع منڈی بہاؤالدین کے مختلف مقامات سے دیسی گھی، کھویا، دودھ، جلیبی کے نمونے لے کر لیب میں چیک کیا۔
مختلف یونٹس کے نمونے غیر معیاری، غیر صحت بخش اور ملاوٹ کے پائے گئے جو انسانی صحت کے لیے انتہائی خطرناک تھے۔ فوری کارروائی کرتے ہوئے کٹھلیہ شیخاں میں دیسی گھی پوائنٹ کو سیل کر دیا گیا۔
اسی طرح تین مختلف مقامات پر دودھ کی دکانوں کے دودھ کے نمونے فیل ہونے پر دودھ مالکان کو مجموعی طور پر 70 ہزار روپے جرمانہ اور 7 ہزار لیٹر دودھ موقع پر تلف کر دیا گیا۔ اسی طرح صفائی کے ناقص انتظامات پر ایک جلیبی پوائنٹ اور ایک چکن شاپ کو سیل کر کے کام کرنے سے روک دیا گیا جبکہ چکن فروش مالک کو 20 ہزار روپے جرمانہ اور گوشت تلف کر دیا گیا۔
فوڈ سیفٹی ٹیم نے شہر میں دودھ کے ٹرک کو بھی چیک کیا اور سیمپل فیل ہونے پر 3500 لیٹر دودھ موقع پر تلف کیا گیا اور ایک لاکھ روپے جرمانہ عائد کیا گیا۔
ڈپٹی ڈائریکٹر آپریشنز پنجاب فوڈ اتھارٹی عدیل احمد نے کہا کہ عوام کو معیاری خوراک کی فراہمی پنجاب فوڈ اتھارٹی کی اولین ترجیح ہے۔ انسانی صحت سے کھیلنے والے مافیاز کے خلاف یہ آپریشن عوام کو محفوظ اور معیاری خوراک فراہم کرنے کی مہم کا حصہ ہے اور یہ کارروائیاں مستقبل میں بھی جاری رہیں گی۔