ایڈیشنل ڈائریکٹر جنرل زراعت پنجاب ڈاکٹر اشتیاق حسین نے کہا ہے کہ زراعت میں جدت اور جدید ٹیکنالوجی فصلوں کی پیداوار کو بڑھایا جا سکتا ہے اور ڈرون سپرے بھی اسی سلسلے کی ایک کڑی ہے ۔ ان خیالات کا اظہار انہوں نے گورنمنٹ سیڈ فارم چیلیانوالہ پر کسانوں اور زمینداروں کے ایک بڑے اجتماع سے خطاب کرتے ہوئے کیا۔
منڈی بہاﺅالدین ( ایم.بی.ڈین نیوز 13 اکتوبر 2022 ) اجتماع میں کسانوں اور زمینداروں کو ڈرون سپرے ٹیکنالوجی کو پریکٹیکل ڈیمانٹریشن دی گئی ۔ اس موقع پر ڈائریکٹر زراعت (فارم اینڈ ٹریننگ ) گوجرانوالہ ڈاکٹر مزمل کاہلوں، ڈائریکٹر زراعت (فارم اینڈ ٹریننگ ) شیخوپورہ ڈاکٹر محمد طارق ، ڈپٹی ڈائریکٹر زراعت (توسیع) شیخ محمد اقبال ، اسسٹنٹ ڈائریکٹر زراعت (توسیع) محمد افضل، کسانوں اور زمینداروں کی کثیر تعداد بھی موجود تھی۔
ایڈیشنل ڈائریکٹر جنرل زراعت پنجاب ڈاکٹر اشتیاق حسین نے بتایا کہ ڈرون ٹیکنالوجی سے زراعت میں انقلاب برپا کیا جا سکتا ہے ، ڈرون سے دھان اور کماد کی فصل پر انتہائی اور کم وقت میں زرعی زہروں کا سپرے کیا جا سکتا ہے جس سے غیر ضروری جڑی بوٹیوں کا صفایا ہو جائے گا ۔
انہوں نے بتایا کہ ڈرون سے5 لٹر پانی سے ایک ایکڑ کو 3 منٹ میں سپرے کر دیتا ہے اور ایک دن میں 150 سے 200 ایکڑ سپرے کیاجا سکتا ہے جو کہ عام طریقے سے سپرے کرنے سے آدھے وقت کی بچت ہوتی ہے ۔ ڈائریکٹر زراعت (فارم اینڈ ٹریننگ )گوجرانوالہ ڈاکٹر مزمل کاہلوں، ڈائریکٹر زراعت (فارم اینڈ ٹریننگ ) شیخوپورہ ڈاکٹر محمد طارق نے کہا کہ ضلع بھر کے کسانوں کو پرائیویٹ فرم گلیکسی رائس گوجرانوالہ کے تعاون سے کرایہ پر سپرے کی خدمات فراہم کرے گی اور کوئی بھی کسان اور زمیندار اپنی دھان اور کماد کی فصل کو کرایہ پر سپرے کروا سکتے ہیں ۔
ڈپٹی ڈائریکٹر زراعت شیخ محمد اقبال نے کہا کہ ملک میں بڑھتی ہوئی آبادی کی غذائی ضروریات کو مستقل بنیادوں پر پورا کرنے کیلئے دھان ، کماد اور زرعی اجناس کی فی ایکڑ پیداوار میں اضافہ ضروری ہے، فصلوں کی جدید پیداواری ٹیکنالوجی کی کاشتکاروں تک آگاہی ضروری ہے ۔جدید زرعی ٹیکنالوجی کے استعمال سے ہی فصلوںکی فی ایکڑ پیداوار میں اضافے کے حصول کو ممکن بنایا جا سکتا ہے۔
انہوں نے بتایا کہ محکمہ زراعت جدید زرعی تکنیک سے فصل کی پیداوار سے لے کر کٹائی تک کاشتکاروں کی تربیت اور مکمل رہنمائی فراہم کرتا ہے تاکہ کاشت کار زیادہ سے زیادہ فصل اگا کر ملک معیشت میں اہم کردار ادا کرے ۔ محکمہ زراعت (توسیع) کا عملہ ہر سنٹر پر کاشتکاروں کی رہنمائی کیلئے موجود ہے ۔ کاشتکار اس سہولت سے بھر پور فائدہ اٹھائیں۔