وزیر اعلیٰ پنجاب سید محسن رضا نقوی اور چیف سیکرٹری پنجاب زاہد اختر زمان کی ہدایت پرڈپٹی کمشنر شاہد عمران مارتھ نے ضلعی بہبود فنڈ بورڈ کے تحت پنجاب حکومت کے حاضر سروس، ریٹائرڈ اور وفات پا جانے والے سرکاری ملازمین اور ان کے اہل خانہ کی مالی امداد کیلئے 2 کروڑ 3 لاکھ 83 ہزار روپے تقسیم کر دئیے۔
منڈی بہاوالدین (ایم.بی.ڈین نیوز 21جون 2023 ) اس حوالے سے ایک تقریب ڈی سی آفس میں منعقد ہوئی۔ ڈپٹی کمشنر شاہد عمران مارتھ نے ضلعی حکومت کے کل 755ملازمین کو مختلف مدات جن میں شادی گرانٹ، کفن دفن اور سکالر شپ کے چیکس تقسیم کئے ،جن کی کل مالیت 2 کروڑ 3 لاکھ 83 ہزار روپے ہے ۔
تفصیلات کے مطابق شادی گرانٹ کے 148 چیکس جن کی کل مالیت 81 لاکھ 35 ہزار روپے ہے، اسی طرح تدفین گرانٹ کے 113 چیکس جن کی کل مالیت 39 لاکھ 55 ہزار روپے ہے جبکہ سکالر شپ کے 494 چیکس جن کی مالیت 82 لاکھ 93 ہزار روپے ہے۔ اس موقع پر ڈپٹی کمشنر شاہد عمران مارتھ کا کہنا تھا کہ سرکاری ملازمین حکومت کا قیمتی اثاثہ ہیں اور ان کی اور ان کے اہل و عیال کی بر وقت امداد ایک فرض ہے، جس کی ادائیگی فوری ہونی چاہیئے۔
ان کا کہنا تھا کہ چیکس کی تقسیم حقداران تک شفاف انداز میں بر وقت ہونی چاہیئے تا کہ سرکاری ملازمین اور ان کے اہل خانہ کی مالی مشکلات میں کسی حد تک کمی لائی جا سکے۔تقریب کے اختتام پر بہبود فنڈ کی بر وقت ادائیگی پر ملازمین اور ان کے اہل خانہ نے وزیراعلیٰ پنجاب ، چیف سیکرٹری پنجاب اور کمشنر گوجرانوالہ کا شکریہ ادا کیا۔