ڈپٹی کمشنر تسنیم علی خاں اور ممبر قومی اسمبلی حاجی امتیاز احمد چوہدری نے کہا ہے کہ ترقیاتی سکیموں کیلئے مختص فنڈز قوم کی امانت ہیں جن کی ایک ایک پائی دیانتداری سے خرچ کی جانی چاہیے، انہوں نے کہاکہ تمام ترقیاتی سکیموں کو مقررہ ٹائم لائن کے اندر پایہ تکمیل تک پہنچایا جائے اور ان کے تعمیراتی معیار کو یقینی بنایا جائے تاکہ یہ منصوبے دیرپا ثابت ہوںاور عوام الناس ان سے زیادہ سے زیادہ مستفید ہوں۔
منڈی بہاﺅالدین( ایم.بی.ڈین نیوز 3ستمبر2022) ان خیالات کا اظہار انہوں نے منڈی بہاﺅالدین تا سرائے عالمگیر زیر تکمیل روڈ اور رسول یونیورسٹی آف ٹیکنالوجی پر جاری کام کا معائنہ کرتے ہوئے کیا۔ اس موقع پر ایڈیشنل ڈپٹی کمشنر فنانس حافظ غلام مرتضٰی، ایکسیئن ہائی وے رانا اقبال، ایکسیئن بلڈنگ قرار شاہ، ایکسیئن روڈ اور دیگرمتعلقہ افسران بھی موجود تھے۔
انہوں نے ان ترقیاتی منصوبوں پر فزیکل اور فنانشل پراگرایس رپورٹس کا بھی معائنہ کیا اور بعض تکنیکی رکاوٹوں کو دور کرنے اور مسائل کے حل پر ضروری ہدایات بھی جاری کیں۔ دورے کے دوران ایکسیئن ہائی وے، روڈز اور ایکسیئن بلڈنگ نے ڈپٹی کمشنر اور ممبر قومی اسمبلی کو جاری ترقیاتی سکیموں کے حوالے سے تفصیلی بریفنگ دی ۔
بریفنگ کے دوران بتایا گیا کہ زیر تکمیل رسول یونیورسٹی جس کا تخمینہ لاگت 5889.250 ملین روپے ہے اور اس کیلئے اب تک 1090.729 ملین روپے ریلیز ہو چکے ہیں اور اس پراجیکٹ پر تیزی سے کام جاری ہے ۔جس پر ڈپٹی کمشنر نے ایکسیئن بلڈنگ کو 31دسمبر تک تمام فنڈز استعمال کرنے کی ہدایت کی ۔ انہوں نے کہا کہ ہر دو ہفتے کے بعد وزٹ کر کے ترقیاتی سکیموں کی رفتار اور کوالٹی کو چیک کروں گا۔
ڈپٹی کمشنر نے منڈی تا سرائے عالمگیر روڈ پر کام کی رفتار کو مزید تیز کرنے کی بھی ہدایت کی۔ انہوں نے کہا کہ ترقیاتی سکیموںسے متعلقہ محکمے ذمہ داری کا مظاہرہ کریں، شہری سہولیات کی فراہمی کو یقینی بنانے کے لیے منظم منصوبہ بندی کے تحت ٹیم ورک کے تحت مطلوبہ نتائج کا حصول ممکن بنایا جائے کیونکہ جتنی جلدی ترقیاتی کام مکمل ہوں گے عوام الناس اتنی جلدی ہی ان سے مستفید ہوں گے۔
ممبر قومی اسمبلی نے کہا کہ عمران خان اور وزیراعلیٰ پنجاب سڑکوں اور دیگرز فلاحی منصوبہ جات کی تعمیرو توسیع کیلئے ہر ممکن وسائل اور فنڈز مہیا کر رہی ہے لہذٰا تمام منصوبہ جات کی تکمیل وقت پر مکمل کی جائے ۔ غیر ضروری تاخیر ہر گز برداشت نہیں کی جائے گی۔انہوں نے متعلقہ افسران اور انجینئرزکو ہدایت کی کہ وہ ترقیاتی کاموں کی کوالٹی پر بھی خصوصی توجہ دیں۔