ڈپٹی کمشنر طارق علی بسرا اور ڈی پی او ساجد حسین کھوکھر کی قیادت میں ضلع میں آمدہ محرم الحرام کے دوران امن و مان کی فضا برقرار رکھنے کیلئے پاک آرمی ،رینجرز، ضلع کی پولیس اور سکیورٹی اداروں، ریسکیو 1122 نے فلیگ مارچ کیا۔
منڈی بہاﺅالدین (ایم.بی.ڈین نیوز 16 اگست2021 ) فلیگ مارچ ڈپٹی کمشنر آفس سے شروع ہو کر شہر کی اہم شاہرات اور جیل چوک سے گزرتا ہوا منڈی شہر، صدر بازار، کمیٹی چوک، ملکوال، میانہ گوندل، گوجرہ ، قادرآباد، مانو چک، جانو چک ، پھالیہ سے ہوتا ہوا واپس ڈپٹی کمشنر آفس میں اختتام پذیر ہوا۔ فلیگ مارچ میں پاک آرمی کے دستوں،ضلعی افسران، سرکل افسران، ایس ایچ اوز، پولیس، ایلیٹ فورس اور ٹریفک پولیس اور ریسکیو 1122 کے جوانوں نے شرکت کی۔
اس موقع پر ڈپٹی کمشنر طارق علی بسرا نے کہاکہ فلیگ مارچ کا مقصد محرم الحرام میں امن و امان کی فضا کو برقرار رکھنے کے ساتھ شہریوں کو تحفظ کا احساس دلانا ہے کہ ضلعی انتظامیہ ان کے جان مال کی محافظ ہے اور عوام الناس کی جان ومال کی حفاظت کرنا اور امن و امان کی صورتحال کو برقرار رکھنا ضلعی انتظامیہ کی اولین ذمہ داری ہے اور یہی وجہ ہے کہ ضلعی انتظامیہ اور پولیس اس ذمہ داری کو پورا کرنے کیلئے ہر دم پر عزم اور تیار ہیں۔
انہوں نے کہا کہ محرم الحرام کے مہینے میں ضلع میں امن و امان کو برقرار رکھنے اور شہریوں کی جان و مال کی حفاظت کیلئے ضلعی انتظامیہ اور پولیس متحرک ہے ، انتظامیہ اور پولیس کسی بھی ہنگامی صورتحال سے نمٹنے کیلئے تیار ہے ، امن و امان کے قیام کیلئے تمام وسائل بروئے کار لائے جائیں گے۔ انہوں نے مذید کہا کہ محرم الحرام کے جلوسوں اور مجالس کے تمام راستوں پر سکیورٹی ہائی الرٹ رہے گی۔ کیمروں کے ذریعے مجالس کی نگرانی کی جائے گی۔ انہوں نے کہاکہ جلوس کے راستوں میں آنے والی رکاوٹوں کو ختم کیا جائے گا.
انہوں نے کہا کہ تاجر برادری انتظامیہ اور پولیس کے ساتھ تعاون حاصل ہو گا اور تمام راستوں پر یکم محرم سے 10محرم تک سکیورٹی ہائی الرٹ ہے اور نویں اور دسویں محرم کو اضافی دستے بھی تعینات کئے جائیں گے ۔ انہوں نے کہاکہ تمام جلوس کے راستوں پر خار دار تاریں لگا کر بند کر دیا جائے گا اور عزاداروں کیلئے بہترین انتظامات کئے جائیں گے اوراس امر کیلئے انتظامیہ اور پولیس کسی بھی ہنگامی صورتحال سے نمٹنے کیلئے مکمل تیار ہے اورنقص امن کا باعث بننے والے عناصر کے ساتھ سختی سے نمٹا جائے گا۔
