ڈپٹی کمشنر شاہد عمران مارتھ نے کہا ہے کہ اپنے فرائض منصبی محنت، ایمانداری، خلوص نیت سے ادا کرتے ہوئے شاندار انداز میں سروس مکمل کرنے والے ملازمین قابل رشک ہیں، ہمیں چاہیے کہ پبلک سروس ڈیلیوری کے عمل میں بہترین خدمات سر انجام دیتے ہوئے ریٹائر ڈ ہونیوالے اور پروموشن پانے والے ملازمین کو خراج تحسین پیش کرنے میں کوئی کسر نہ اٹھا رکھیں۔
منڈی بہاوالدین ( ایم.بی.ڈین نیوز 28فروری 2024 ) ان خیالات کا اظہار انہوں نے ڈی سی آفس کے ملازمین کی ریٹائرمنٹ اور پروموشن کے سلسلہ میں منعقدہ تقریب کی صدارت کرتے ہوئے کیا۔ ڈپٹی کمشنر کا کہنا تھا کہ ملازمین کی پروموشن ان کا حق ہے تاکہ وہ زیادہ بہتر انداز سے اپنی ذمہ داریاں ادا کر سکیں، سرکاری ملازمین دیانتداری ، محنت اور لگن سے کام کریں تاکہ ان کی بروقت پروموشن کی جا سکے۔
تفصیلات کے مطابق ریٹائرڈ ہونے والے ملازمین رانا محمد ارشد، سپرنٹنڈنٹ، صفدر علی بھٹی اسسٹنٹ، تنویر علی خان اسسٹنٹ،محمد انور سینئر کلرک اور پروموشن حاصل کرنے والے محمد اسلم تارڑبطور اسسٹنٹ، مظہر اقبال بطور سینئر کلرک، توقیر اور شاہد غفور بطور جونیئر کلرکس شامل ہیں۔ تقریب کے اختتام پر ڈپٹی کمشنرنے ریٹائرڈ ہونے والے ملازمین میں یادگاری شیلڈز تقسیم کیں جبکہ پروموشن پانے والے ملازمین میں پروموشن لیٹرز تقسیم کئے۔