ڈپٹی کمشنر ملک عباس ذوالقرنین اعوان کی زیر صدارت ڈسٹرکٹ کوآرڈی نیشن کمیٹی برائے پاپولیشن کا اجلاس ڈی سی کمپلیکس کے کانفرنس روم میں منعقد ہوا۔ اجلاس میں سی ای او ہیلتھ ڈاکٹر محمد عابد یوسف،سی ای او ایجوکیشن محمد یاسین ورک، ڈسٹرکٹ پاپولیشن ویلفیئر آفیسر محمد آصف نوید ،ڈی ایچ اوز ڈاکٹر شکیل اقبال بٹ، ڈاکٹر افتخار، میڈیکل سپرنٹنڈنٹ ڈسٹرکٹ ہیڈ کوارٹر ہسپتال ڈاکٹر قمر الزمان گورائیہ ، ڈپٹی ڈسٹرکٹ پاپولیشن ویلفیئر آفیسرعتیق الرحمٰن اور دیگرمحکموں کے افسران نے شرکت کی۔
منڈی بہاﺅالدین( ایم.بی.ڈین نیوز 31جنوری 2023 ) ڈسٹرکٹ پاپولیشن ویلفیئر آفیسر محمد آصف نویدنے شرکاءاجلاس کو ماہانہ کارکرگی کے حوالے سے محکمہ بہبود آبادی کی جانب سے فراہم کردہ سہولیات ، آگاہی اور دیگر متعلقہ امورز پر تفصیلی بریفنگ دیتے ہوئے بتایا کہ رواں ماہ کے دوران محکمہ بہبود آبادی نے ضلع کی تینوں تحصیلوں میں دور دراز مقامات پر 8،8 کیمپس لگائے، جہاں مانع حمل ادویات اور دیگر سہولیات فراہم کی گئیں ۔
محکمہ بہبود آبادی کی فیلڈ ورکنگ سرگرمیوں کی وجہ سے عوام الناس میں درمیانی مدت کے مانع حمل ادویات کے استعمال میں اضافہ ہورہا ہے۔انہوں نے بتایا کہ محکمہ کی سربراہی میں 51 فلاحی مراکز، 3 فیملی ہیلتھ کلینکس، 3 فیملی ہیلتھ موبائل یونٹس، 69 فیملی ویلفیئر اسسٹنٹ، 13سوشل موبلائزر عوام الناس کو خاندانی منصوبہ بندی کے لحاظ سے معیاری طبی سہولیات اور ماں ، بچے کی صحت اور خاندانی منصوبہ بندی کے حوالے سے سہولیات مہیا کر رہے ہیں۔
انہوں نے اجلاس کو مزید بتایا کہ سکولوں، کالجوں اور یونیورسٹیوں میں بلوغت، ذاتی صفائی اور متوازن غذا کے حوالے سے ضروری معلوماتی سیشنز اور سیمینارز منعقد کئے جا رہے ہیں اور جمعہ کے خطبات میں ماں اور بچے کی صحت کے حوالے سے بھی آگاہی بھی فراہم کی جاتی ہے ۔ جس کے خاطر خواہ نتائج حاصل ہو رہے ہیں اور بہبود آبادی کے اصولوں کی حمایت میں روشنی کی نئی امید پیدا ہوئی ہے ۔جس پر ڈپٹی کمشنر ملک عباس ذوالقرنین نے کہا کہ حکومت پنجاب آبادی میں بے ہنگم اضافہ کی روک تھام کیلئے اصلاحی و انتظامی اقدامات کر رہی ہے، کیونکہ وسائل اور آبادی کے توازن کو برقرار رکھ کر ہی ملکی ترقی ممکن ہو سکتی ہے ۔
انہوں نے کہا کہ محکمہ بہبود آبادی عملی طور پر کوالٹی آف ورک کو یقینی بنائے تا کہ بڑھتی ہوئی آبادی کی روک تھام کیلئے آگاہی مہم کو فعال اور موثر بنایا جا سکے ۔انہوں نے کہا کہ شادی شدہ جوڑوں کو خاندانی منصوبہ بندی کے بارے خاص طور پر آگاہی دیں ،بلاشبہ محکمہ بہبود آبادی کا بنیادی کام ہی عوام الناس کو مختلف طریقوں سے آمادہ کر کے خاندانی منصوبہ بندی پر عملدرآمد کروانا ہے۔ ڈپٹی کمشنر نے کہا کہ محکمے کی سرگرمیوں کے حوالے سے جہاں جہاں خامیاں پائی جاتی ہیں ان کو درست کر کے مذید موثر اور فعال بنایا جائے۔