فیصل آباد: کماد کی فی ایکڑ پیداوار میں اضافہ کے لئے 2 ارب 73 کروڑ روپے کی لاگت سے قومی پروگرام پر عملدرآمد جاری ہے۔ اس پروگرام کے تحت ستمبر کاشتہ کماد میں مخلوط و چپ بڈ ٹیکنالوجی کی کاشت کے لئے سرگودھا، بھکر،فیصل آباد، ٹوبہ ٹیک سنگھ، منڈی بہاؤالدین، مظفر گڑھ، قصور، راجن پور، لیہ، بہاولپور، رحیم یار خان، جھنگ اور چنیوٹ کے اضلاع کے کاشتکاروں سے درخواستیں مطلوب ہیں۔
آن لائن کے مطابق اس پروگرام کے تحت حکومت پنجاب ایک ایکڑ کاشت پر 5 ہزار روپے سبسڈی دے گی۔ ایک کسان زیادہ سے زیادہ 5 ایکڑ پر پروجیکٹ کی مدت کے دوران صرف ایک بار سبسڈی حاصل کر سکتا ہے۔ درخواست دہندہ کا محکمہ زراعت میں رجسٹر ہونا ضروری ہے۔ کماد کسان رجسٹریشن کے لیے اسسٹنٹ ڈائریکٹر زراعت (توسیع) متعلقہ دفتر سے رابطہ کریں۔
درخواستیں تحصیل سطح پر اسسٹنٹ ڈائریکٹر زراعت (توسیع) کے دفتر میں وصول کی جائیں گی اور مکمل جانچ پڑتال کے بعد ان کی قرعہ اندازی کی جائے گی۔ قرعہ اندازی میں کامیاب ہونے کے بعد درخواست دہندہ محکمانہ سفارشات کے بعد کاشت کا ذمہ دار ہوگا۔
اس سلسلے میں کاشتکار درخواست فارم متعلقہ اسسٹنٹ ڈائریکٹر زراعت (توسیع) یا ایگریکلچر آفیسر (توسیع) کے دفاتر سے مفت حاصل کر سکتے ہیں یا محکمہ زراعت پنجاب کی ویب سائٹ www.agripunjab.gov.pk سے ڈاؤن لوڈ کر سکتے ہیں۔ . فارم کی فوٹو کاپی بھی قابل قبول ہوگی۔ کسان 4 ستمبر 2023 تک مکمل شرائط و ضوابط کو مکمل کرکے اپنی درخواستیں جمع کراسکتے ہیں۔