سرکل آفیسر اینٹی کرپشن منڈی بہاءالدین مرزا عمران الحق کی ہدایت پر رشوت کے خلاف کامیاب کارروائی کرتے ہوئے اینٹی کرپشن نے یونین کونسل میانہ گوندل میں ریڈ کے دوران ایک شخص کو رنگے ہاتھوں گرفتار کر لیا۔
تفصیلات کے مطابق ایک شہری نے اینٹی کرپشن دفتر میں درخواست دی کہ شناختی کارڈ کے حصول کیلئے پیدائش سرٹیفکیٹ کے اندراج کے سلسلے میں اس سے رشوت طلب کی جا رہی ہے۔ درخواست گزار کے مطابق احمد مختار، جو خود کو سیکرٹری یونین کونسل ظاہر کرتا تھا، نے نئے اندراج کے عوض بھاری رقم طلب کی، تاہم معاملہ آٹھ ہزار روپے میں طے پایا۔
شہری کی شکایت پر اینٹی کرپشن نے مجسٹریٹ کی نگرانی میں منصوبہ بندی کے ساتھ کارروائی کی اور نامزد ملزم احمد مختار (نائب قاصد یونین کونسل میانہ گوندل) کو نشاندہی شدہ رقم وصول کرتے ہوئے رنگے ہاتھوں گرفتار کر لیا۔
اینٹی کرپشن حکام کے مطابق ملزم کے خلاف قانون کے مطابق مقدمہ درج کر کے مزید تفتیش شروع کر دی گئی ہے۔ شہریوں نے اینٹی کرپشن کی اس بروقت کارروائی کو سراہتے ہوئے امید ظاہر کی ہے کہ رشوت کے خلاف ایسی کارروائیاں مستقبل میں بھی جاری رہیں گی۔