پنجاب بھر میں مون سون کے نویں اور آخری سلسلے کے لیے الرٹ جاری کر دیا گیا

لاہور: پی ڈی ایم اے (PDMA) پنجاب نے مون سون بارشوں کے نویں اور آخری سلسلے کے پیشِ نظر صوبہ بھر میں الرٹ جاری کر دیا ہے اور آج سے 17 ستمبر تک بیشتر اضلاع میں بارش کی پیش گوئی کی ہے۔

پی ڈی ایم اے کے ترجمان کے مطابق آج راولپنڈی، جہلم، چکوال، تلہ گنگ اور اٹک میں بارش متوقع ہے۔ لاہور میں موسم خشک اور گرم رہنے کا امکان ہے اور درجہ حرارت 27 سے 36 ڈگری سینٹی گریڈ کے درمیان رہنے کی توقع ہے۔

پی ڈی ایم اے کا کہنا ہے کہ لاہور، سیالکوٹ، شیخوپورہ، نارووال، منڈی بہاؤالدین، گوجرانوالہ، گجرات، وزیرآباد، حافظ آباد، قصور، اوکاڑہ، ننکانہ صاحب اور سرگودھا میں کل سے 17 ستمبر تک بارش کا امکان ہے۔

اسی طرح خوشاب، میانوالی، نور پور تھل، فیصل آباد، جھنگ، ٹوبہ ٹیک سنگھ، لیہ، بھکر، ساہیوال، ڈیرہ غازی خان، ملتان اور گردونواح میں بھی بارش کی پیشگوئی کی گئی ہے۔

ڈی جی پی ڈی ایم اے ثاقب انور جپہ نے مری، گلیات اور دیگر پہاڑی علاقوں میں لینڈ سلائیڈنگ کے خدشے کے پیشِ نظر تمام کمشنرز اور ڈپٹی کمشنرز کو الرٹ رہنے کی ہدایات جاری کی ہیں۔