منڈی بہاﺅالدین( ایم.بی.ڈین نیوز 09 نومبر 2021) ایڈیشنل ڈپٹی کمشنر جنرل محمد شفیق نے کہا ہے کہ خسرہ اور روبیلا ایک مہلک مرض ہیں جس کے خاتمے کیلئے عوام الناس بالخصوص والدین کا تعاون ناگزیر ہے، انہوں نے کہا کہ انسداد خسرہ مہم کو کامیاب بنانے اور عوامی آگاہی کیلئے علمائے کرام اور میڈیا کے رول کو نظر انداز نہیں کیا جا سکتا، ان کی خدمات سے بھر پور استفادہ حاصل کیا جائے۔
ان خیالات کااظہا ر انہوں نے آج یہاں ڈی سی آفس میں انسداد خسرہ مہم کے انتظامات کے حوالے سے منعقدہ جائزہ اجلاس کی صدارت کرتے ہوئے کیا۔سی ای او ہیلتھ ڈاکٹر محمد الیاس گوندل نے اجلاس کو 15 نومبر سے 27 نومبر 2021 تک 13 روزہ جاری رہنے والی مہم کی تیاریوں کے حوالے سے بتایا کہ اس مہم میں 9 ماہ کی عمر سے لے کر 15 سال تک کے 6 لاکھ 63 ہزار420 بچوں کی ویکسی نیشن کی جائے گی۔
اس مہم میں محکمہ صحت کی431 ٹیمیں ،78 فکسڈ سائٹس،65 ٹیم سپورٹس سنٹرز، 124 یو سی ایم اوز، 12 سپروائزرز ، 6 ڈی ایچ ایم ٹی ،509 سکلڈ پرسنز،509 ٹیم اسسٹنٹ، اور 940 سوشل موبلائزرز اس مہم میں حصہ لیں گے اور اس حوالہ سے مائیکرو پلاننگ کر لی گئی ہے ۔ انہوں نے بتایا کہ اس مہم کیلئے ضلع میں 65 سنٹرز قائم کر دئیے گئے ہیں ۔ یہ13روزہ مہم صبح 9بجے سے لے کر شام 4بجے تک جاری رہا کرے گی۔
جس پر ایڈیشنل ڈپٹی کمشنر محمد شفیق نے کہاکہ انسداد خسرہ مہم کو ہر صورت کامیاب بنایا جائے، قوم کے نونہالوں کو بیماریوں سے بچانے کیلئے تمام ممکنہ وسائل بروئے کار لائے جائیں۔ انہوں نے ہدایت کی کہ وہ انسداد خسرہ مہم کی کامیابی کے حوالے سے محکمہ صحت کی ٹیموں کے ساتھ گھر گھر جاکر ناصرف خسرہ کے مرض کے حوالے سے بلکہ احتیاطی تدابیر اور علاج کے حوالے سے بھی آگاہی دیں تاکہ ضلع کو خسرہ فری بنانے میں مدد مل سکے۔
اجلاس میں سی او ایجوکیشن محمد یاسین ورک، ڈسٹرکٹ ہیلتھ آفیسرز ڈاکٹر افتخار احمد، ڈاکٹر شکیل اقبال بٹ، ڈاکٹر خالد عباسی،میڈیکل سپرنٹنڈنٹ ڈاکٹر قمر الزمان گورائیہ، ڈسٹرکٹ فوکل پرسن برائے ای پی آئی/پولیورافعہ ناہید، پی اے ٹو سی او ہیلتھ ارسلان رﺅف کے علاوہ دیگر متعلقہ محکموں کے افسران بھی موجود تھے۔