ڈپٹی کمشنر طارق علی بسرا نے کہا ہے کہ عالمی برادری مقبوضہ کشمیر میں کشمیر یوں پر بھارت کے غاصبانہ قبضے اور مظالم کا نوٹس لے، کشمیریوں سے ان کی آزادی کا حق کوئی نہیں چھین سکتا، انہوں نے کہا کہ 22 کروڑ پاکستانی عوام کے د ل کشمیریوں کے ساتھ دھڑکتے ہیں
منڈی بہاﺅالدین ( ایم.بی.ڈین نیوز 27 اکتوبر 2021)انہوں نے کہا کہ پاکستان بالخصوص منڈی بہاﺅالدین کے عوام کشمیروں کے حق خود ارادیت اور آزادی کی جدوجہد میں ان کے شانہ بشانہ کھڑے ہیں، کشمیریوں کی آزادی کا سورج جلد طلوع ہونے والا ہے، انہوں نے بتایا کہ وزیراعظم پاکستان عمران خان نے ہر عالمی فورم پر کشمیر کے حوالے سے پاکستانی قوم کا موقف ذمہ دارانہ انداز میں پیش کیا جس سے مسئلہ کشمیر عالمی سطح پر ایک بنیادی ایشو بن گیا ہے۔
ان خیالات کا اظہار انہوں نے یہاں کشمیر پر بھارت کے 74 سالہ غاصبانہ قبضے کے موقع پر یوم سیاہ منانے کے حوالے سے منعقدہ ریلی کی قیادت کرتے ہوئے کیا ۔ ریلی کے شرکاء نے ہاتھوں میں کشمیر کے جھنڈے، یوم سیاہ کے بینرز اور نعروں سے مزین کتبے اٹھا رکھے تھے اور کشمیری عوام سے اظہار یکجہتی کے نعرے لگا رہے تھے۔ ریلی ڈسٹرکٹ کمپلیکس سے شروع ہو کر کینال ویو پارک کے سامنے اختتام پذیر ہوئی ۔
ریلی میں ایڈیشنل ڈپٹی کمشنر جنرل محمد شفیق ، پی ٹی آئی کے نوجوان رہنما عادل امتیاز چوہدری،سی ای او ایجوکیشن محمد یاسین ورک، ڈپٹی ڈائریکٹر سوشل ویلفیئر عاطف علی وڑائچ، ڈپٹی ڈائریکٹر کالجز محمد فاروق پھپھرا، میڈیکل سپرنٹنڈنٹ منڈی بہاﺅالدین ڈاکٹر قمر الزمان، تعلیمی اداروں کے اساتذہ، طلباء، میڈیا نمائندگان، سیاسی سماجی رہنماﺅں کے علاوہ عوام الناس کی ایک کثیر تعداد بھی موجود تھی۔
ڈپٹی کمشنر طارق علی بسرا نے کہا کہ آج یوم سیاہ کے موقع پر ہر پاکستانی نے مل کر پوری دنیا کو بھارت کا بھیانک چہرہ اور کشمیریوں پر جاری ظلم و ستم کو دکھا دیا ہے اور وہ دن دور نہیں جب کشمیر پر آزادی کا سورج طلوع ہو گا۔ حکومت کی کامیاب خارجہ پالیسی نے بھارت کو مسئلہ کشمیر پر عالمی برادری میں تنہا کر دیا ہے۔ انہوں نے کہا کہ پاکستانی عوام کشمیریوں کی جدوجہد کی آزادی میں ان کے شانہ بشانہ کھڑی ہے اور ہر فورم پر ان کی بھر پور سیاسی، سفارتی اور اخلاقی حمایت کشمیر کی آزادی تک جاری رکھی جائے گی۔
ڈپٹی کمشنر نے کہا کہ پوری پاکستانی قوم بالخصو ص منڈی بہاﺅالدین کے عوام کشمیری بھائیوں کی تحریک آزادی میں دی جانے والی قربانیوں کو خراج تحسین پیش کرتے ہیں۔ ایڈیشنل ڈپٹی کمشنر جنرل محمد شفیق نے کہا کہ یہاں پر موجود عوام نے بھارت سمیت دنیا کو یہ پیغام دے دیا ہے کہ پاکستانی قوم ہر لمحہ ، ہر وقت کشمیریوں کے ساتھ کھڑی ہے اور ان کی تحریک آزادی کیلئے خون کا آخری قطرہ تک بہانے کیلئے تیار کھڑی ہے۔ اسی طرح تحصیل پھالیہ اور ملکوال میں بھی یوم سیاہ کشمیر کے حوالے سے ریلیاں نکالی گئیں جن کی قیادت اسسٹنٹ کمشنر پھالیہ ساجد منیر کلیار اور اسسٹنٹ کمشنر ملکوال عثمان غنی نے کی۔