ڈپٹی کمشنر محمد شاہد نے ڈسٹرکٹ ایمرجنسی ریسپانس کمیٹی برائے انسداد ڈینگی کے حوالے سے منعقدہ اجلاس کی صدارت کرتے ہوئے کہا ہے کہ ڈینگی کے خاتمے کیلئے ہم سب کو ذمہ داری سے کام کرنا ہو گا، عوامی تعاون کے بغیر ڈینگی سے بچاﺅ ممکن نہیں لہذا ڈینگی ٹیمیں گھر گھر جا کر ڈینگی سے بچاﺅ کیلئے احتیاطی تدابیر سے آگاہی دیں.
منڈی بہاﺅالدین(ایم.بی.ڈین نیوز 11 جنوری 2022 ) انہوں نے کہاکہ ڈینگی کی افزائش کے تمام ممکنہ مقامات کی باقاعدگی سے ان ڈور اور آﺅٹ ڈور سرویلینس جاری رکھی جائے تا کہ ڈینگی کی افزائش ممکن نہ ہو سکے اور انسانی جانوں کے تحفظ کو یقینی بنایا جا سکے ۔قبل ازیں سی او ہیلتھ ڈاکٹر محمد الیاس گوندل نے اجلاس کو ان ڈور، آﺅٹ ڈور ڈینگی سرویلنس، ڈینگی سپرے ، انسداد ڈینگی سے متعلق ادویات کے سٹاک، ڈینگی لاروا سائیٹس کے معائنہ کے حوالے سے بریفنگ دیتے ہوئے بتایا کہ اس ہفتے کی کاروائی کے مطابق ہاٹ سپاٹ جگہوں کی چیکنگ کے دوران لاروے پائے جانے پر فوری طور پر مکینیکل لاروا سائیڈنگ کر دی گئی ہے جبکہ سو فیصد تھرڈ پارٹی ویلیڈیشن بھی کر دی گئی ہے۔
یہ بھی پڑھیں: کورونا وائرس پھر سے سر اٹھانے لگا، منڈی بہاءالدین سے 10 نئے کیسز رپورٹ
ڈاکٹر محمد الیاس گوندل نے بتایا کہ ایک ہفتے کے دوران 518 ٹیموں نے ان ڈور75 ہزار950 گھروں کو چیک کیا گیا ہے جبکہ65 ٹیموں نے آﺅٹ ڈور9 ہزار480 گھروں کو چیک کیا۔اسی طرح ان ڈور سرویلینس کے تحت3 لاکھ75 ہزار229 کنٹینرز چیک کئے گئے جبکہ آﺅٹ ڈور سرویلینس کے تحت39 ہزار62 کنٹینرز چیک کئے گئے اور ہاٹ سپاٹ کوریج 100 فیصد رہی۔ انہوں نے بتایا کہ انسداد ڈینگی کے حوالے سے حفاظتی اقدامات نہ کرنے پر19 نوٹسز جاری کئے گئے ہیں ۔ جس پر ڈپٹی کمشنرمحمد شاہد نے کہا کہ جن مقامات سے آج تک ڈینگی لاروا کے مثبت کیسز رپورٹ ہوئے ہیں ان مقامات پر خصوصی توجہ دی جائے اور لگاتار سرویلینس جاری رکھی جائے۔
انہوں نے محکمہ صحت اور دیگر افسران خصوصاًفیلڈ ٹیموں پر زور دیا کہ وہ قبرستانوں، ٹائر شاپس، کباڑخانوں، گملوں اور سروس سٹیشنز سمیت دیگر ہاٹ سپاٹ جگہوں کو مسلسل چیک کریں اور روزانہ کی سرگرمیوں کو اینڈرائیڈ موبائل کے ذریعے ڈیش بورڈ پر اپ لوڈ کریں۔ محمد شاہد نے کہاکہ انسداد ڈینگی سرگرمیوں میں کسی قسم کی سستی اور غفلت ہر گز برداشت نہیں کی جائے گی۔ اجلاس میں ڈسٹرکٹ ہیلتھ آفیسرز ڈاکٹر محمد افتخار، ڈاکٹر شکیل اقبال بٹ، ڈپٹی ڈی ایچ او ڈاکٹر خالد عباسی، ڈپٹی ڈائریکٹر سوشل ویلفیئر عاطف علی وڑائچ، میڈیکل سپرنٹنڈنٹس ڈاکٹر قمر الزمان، ڈاکٹر بشریٰ چوہدری، ناصر وقار، پی اے ٹو سی او ہیلتھ ارسلان رﺅف اور دیگر متعلقہ محکموں کے افسران بھی موجود تھے۔