ڈپٹی کمشنر محمد شاہدنے کہا ہے کہ ریونیو عوامی خدمت کچہریوں میں عوام کے ریونیو سے متعلقہ تمام مسائل ایک ہی چھت کے نیچے ترجیحی بنیادوں پر حل کئے جا رہے ہیں، شہری بلا خوف و خطر خدمت کچہریوں میں آئیں تا کہ ان کے مسائل کو حل کیا جا سکے.
منڈی بہاﺅالدین( ایم.بی.ڈین نیوز 01 جنوری 2022 ) انہوں نے بتایا کہ ضلع کی ہر تحصیل ہیڈ کوارٹرز میں بھی ہر ماہ کے پہلے دو دن باقاعدگی سے خدمت کچہریوں کا انعقاد تسلسل سے کیا جا رہا ہے جس کا بنیادی مقصد عوام اور ضلعی انتظامیہ کے مابین روابط کو مستحکم بنانے کے ساتھ ساتھ ان کے درپیش ریونیو مسائل کو موقع پر حل کرنا ہیں۔ ان خیالات کا اظہار انہوں نے آج یہاں ڈی سی آفس میں منعقدہ ریونیو عوامی خدمت کچہری میں سائلین کی شکایات پر حل کر نے کے احکامات جاری کرتے ہوئے کیا۔
کھلی کچہری میں ایڈیشنل ڈپٹی کمشنر جنرل محمد شفیق، ایڈیشنل ڈپٹی کمشنر ریونیو ڈاکٹر احسان الحق ضیاء، اسسٹنٹ کمشنر منڈی بہاﺅالدین کاشف جلیل، تحصیلدار، نائب تحصیلدار وقار احمد، لینڈ ریکارڈ سنٹر، ریونیو افسران، ریڈر ٹو تحصیلدار عرفان گوندل، ریونیو سے متعلقہ محکموں کے افسران سمیت سائلین کی کثیر تعداد بھی موجود تھی۔ ڈپٹی کمشنر نے ریونیو عوامی خدمت کچہری میں آئے ہوئے سائلین سے خود بھی توجہ اور خلوص سے ان کے مسائل سنے اور ان کے حل کے لئے موقع پر احکامات جاری کئے۔
خدمت کچہری میں آغاز سے لے کر اختتام تک 16 آنے والے سائلین نے اپنے مختلف مسائل کے حوالے سے درخواستیں پیش کیں جنہیں وہاں پر افسران کی موجودگی میں عملہ نے فوری طور پر کاروائی کر کے موقع پر نبٹا دیا جبکہ دیرینہ مسائل والی درخواستوں کو بھی جلد حل کرنے کی یقین دہانی کروائی گئی۔ اس موقع پر ڈپٹی کمشنر محمد شاہد نے کہا کہ ریونیو عوامی خدمت کچہریوں کا انعقاد وزیراعلیٰ پنجاب کا عوام دوست اقدام ہے اور شہریوں نے ان خدمت کچہریوں پر اپنے بھر پور اعتماد کا اظہار کیا ہے۔
انہوں نے بتایا کہ ان کچہریوں میں پٹواری سے لیکر ڈپٹی کمشنر تک عوام الناس کو فرد کے اجراء، درستگی ریکارڈ، انتقالات کے اجراء، انکم سرٹیفکیٹ، معائنہ ریکارڈ، رجسٹری، ڈومیسائل کا اجراء اور ریونیو سے متعلقہ دیگر درپیش مسائل کے حل کے حوالے سے ایک ہی چھت کے نیچے الگ الگ کاﺅنٹرز پر خدمات مہیا کرنے کیلئے موجود ہیں۔ڈپٹی کمشنر محمد شاہد نے ریونیو افسران کو ہدایت کی کہ وہ اوپن ڈور پالیسی کے تحت عوام الناس کے ریونیو سے متعلق مسائل کے فوری ازالہ کیلئے تمام ممکنہ اقدامات اٹھائے جائیں۔