ڈپٹی کمشنر عثمان خالد خان کی ہدایت پر اسسٹنٹ کمشنرز کی سربراہی میں محکمہ زراعت کی زیر نگرانی کسانوں اور کاشتکاروں کو یوریا کھاد کی فراہمی کا سلسلہ شروع ہوگیاہے ۔ ڈپٹی کمشنر نے کسانوں کو مقررہ قیمت پر کھادوں کی فراہمی کو چیک کرنے کے حوالے سے سیل پوائنٹ گوجرہ کا دورہ کیا۔
منڈی بہاوالدین ( ایم.بی.ڈین نیوز 11 جون 2022) انہوں نے کھاد ڈیلرز کے ریکارڈز کو چیک کیا اور کسانوں کو یوریا کھاد کی فراہمی کے عمل کا جائزہ لیا۔انہوں نے کاشت کاروں سے کھاد کی فراہمی کے حوالے سے بھی استفسار کیا اور اپنے اطمینان کا اظہار کیا۔ ڈپٹی کمشنر نے کھاد ڈیلروں کو ہدایت کی کہ وہ کھاد کے مقررکردہ نرخ بل بورڈ پر نمایاں جگہوں پر آویزاں کریں اور کھادوں کے سٹا ک کا ریکارڈ رکھیں۔
اس موقع پر اسسٹنٹ کمشنر منڈی بہاﺅالدین کاشف جلیل ، اسسٹنٹ کمشنر ملکوال عثمان غنی ، ڈپٹی ڈائریکٹر زراعت شیخ محمد اقبال اور دیگر متعلقہ افسران اور کسانوں کی کثیر تعداد بھی موجود تھی۔ ڈپٹی کمشنر کو معیاری کھادوں کی مقررہ قیمتوں پر فراہمی کے حوالے سے بتایا گیا کہ مارکیٹ میں کھاد کی کوئی قلت نہیں ہے اور کھاد دستیاب ہے.
ڈپٹی کمشنر کو مذید بتایا گیا کہ مارکیٹ میں 50 کلو گرام یوریابیگ 1850 روپے میں دستیاب ہے اور کھاد ڈیلرز کو پابند کر دیا گیا ہے کہ وہ کسانوں کو سرکاری قیمت پر کھاد کی فراہمی کو یقینی بنائیں گے۔ جس پر ڈپٹی کمشنر نے کہاکہ زراعت ملکی معیشت میں ریڑھ کی ہڈی کی حیثیت رکھتی ہے،کسان کی خوشحالی کا مطلب ملک کی مجموعی ترقی ہے اور کسان کو سہولتیں فراہم کئے بغیر زرعی شعبے میں ترقی کا خواب شرمندہ تعبیر نہیں کیا جا سکتا۔
انہوں نے کہاکہ حکومت کسانوںکومعیاری کھادوں کی مقررہ قیمتوں پر فراہمی کے حوالے سے بہترین اقدامات اٹھا رہی ہے۔حکومتی پالیسی کے تحت کاشتکاروں کے مفاد کا بھر پور تحفظ کرتے ہوئے کسی کو بھی مہنگی کھاد بیچنے اور ذخیرہ اندوزی کی ہر گز اجازت نہیں دی جائے گی۔ ایسی شکایات موصول ہونے پر پرائس ایکٹ کے تحت جرمانے کے ساتھ گرفتاری بھی عمل میں لائی جائے گی۔