منڈی بہاءالدین( ایم.بی.ڈین نیوز 13 ستمبر 2021)ایڈیشنل ڈپٹی کمشنر جنرل محمد شفیق نے کہا ہے کہ ڈینگی کا خاتمہ حکومت کی اہم ترجیح ہے۔ موجودہ موسم میں ڈینگی کی افزائش کو روکنا انتہائی اہم ہے اس سلسلے میں انسداد سرگرمیوں میں کوئی کمی و کوتاہی نہیں ہونی چاہیئے۔انہوں نے محکمہ صحت کے افسران کو واضح ہدایات جاری کرتے ہوئے کہا کہ ان ڈور ، آﺅٹ ڈور سرویلنس کے کام میں مذید بہتری لائیں اور اس کے نتائج کی روشنی میں لاروا سائیڈنگ کاکام بھر پور طریقے سے مستقل بنیادوں پر جاری رکھیں تاکہ کسی بھی طرح ڈینگی کی افزائش ممکن نہ ہوسکے۔
ان خیالات کا اظہار انہوں نے آج یہاں ڈی سی آفس میں ڈسٹرکٹ ایمرجنسی ریسپانس کمیٹی برائے انسداد ڈینگی کے حوالے سے منعقدہ اجلاس کی صدارت کرتے ہوئے کیا۔ اجلاس میں سی ای او ہیلتھ ڈاکٹر محمد الیاس گوندل، سی ای او ایجوکیشن محمد یاسین ورک، ڈسٹرکٹ ہیلتھ آفیسرز ڈاکٹر محمد افتخار، ڈاکٹر شکیل اقبال بٹ، ڈاکٹر خالد عباسی، میڈیکل سپرنٹنڈنٹ منڈی بہاﺅالدین ڈاکٹر قمر الزمان، پھالیہ ڈاکٹر ناصر وقار، ڈپٹی ڈسٹرکٹ پاپولیشن ویلفیئر آفیسر عتیق الرحمٰن، اسسٹنٹ ڈائریکٹر زراعت (توسیع)، فیلڈ آفیسر ماحولیات عاطف عمران ،ڈسٹرکٹ فوکل پرسن برائے ای پی آئی/پولیورافعہ ناہید، پی اے ٹو سی او ہیلتھ ارسلان رﺅف کے علاوہ دیگر متعلقہ محکموں کے افسران بھی موجود تھے۔
قبل ازیں سی او ہیلتھ ڈاکٹر محمد الیاس گوندل نے اجلاس کو ان ڈور، آﺅٹ ڈور ڈینگی سرویلنس، ڈینگی سپرے ، انسداد ڈینگی سے متعلق ادویات کے سٹاک، ڈینگی لاروا سائیٹس کے معائنہ کے حوالے سے بریفنگ دیتے ہوئے بتایا کہ اس ہفتے کی کاروائی کے مطابق ہاٹ سپاٹ جگہوں کی چیکنگ کے دوران 10 لاروے پائے جانے پر فوری طور پر مکینیکل لاروا سائیڈنگ کر دی گئی ہے جبکہ سو فیصد تھرڈ پارٹی ویلیڈیشن بھی کر دی گئی ہے۔
انہوں نے بتایا کہ ضلع بھر میں ابھی تک ڈینگی کا کوئی مریض رپورٹ نہیں ہوا۔ ڈاکٹر محمد الیاس گوندل نے مذید بتایا کہ 06 سے 12ستمبر تک 518 ٹیموں نے ان ڈور 95 ہزار 800 گھروں کو چیک کیا گیا ہے جبکہ 65 ٹیموں نے آﺅٹ ڈور 11 ہزار 250 گھروں کو چیک کیا۔اسی طرح ان ڈور سرویلینس کے تحت3 لاکھ95 ہزار70 کنٹینرز چیک کئے گئے جبکہ آﺅٹ ڈور سرویلینس کے تحت43 ہزار640 کنٹینرز چیک کئے گئے اور ہاٹ سپاٹ کوریج 100 فیصد رہی۔
انہوں نے بتایا کہ انسداد ڈینگی کے حوالے سے حفاظتی اقدامات نہ کرنے پر861 افراد کو نوٹسز بھی جاری کئے گئے ہیں ۔ بریفنگ سننے کے بعد ایڈیشنل ڈپٹی کمشنر محمد شفیق نے کہا کہ ڈینگی کمیونٹی ڈیزیز ہے اس پر مکمل طور پر قابو پانے کیلئے اجتماعی آگاہی اور عملی اقدمات انتہائی ناگزیر ہیں، عوام الناس کو ڈینگی سے بچانے کیلئے ویکٹر سرویلنس کے ساتھ ساتھ ضلع بھر میں لاروہ کے پیدا ہونے والی جگہوں کو ختم کرنے کیلئے جنگی بنیادوں پر کام کیا جا ئے۔ انہوں نے ہدایت کی کہ مون سون کی بارشوں سے ڈینگی ماحول کو متاثر کر سکتا ہے اس لئے ڈینگی کے خاتمہ اور اس کے کنٹرول کیلئے ضلع بھر میں تمام متعلقہ محکمے خصوصاً محکمہ صحت بھر پور اقدامات کرے .
اس ضمن میں حکومت پنجاب کے جاری کردہ ایس او پیز پر سختی سے عملدرآمد کروایا جائے اس حوالے سے کوئی کوتاہی یا سستی ہر گز برداشت نہیں کی جائے گی۔محمد شفیق نے افسران کو ہدایت کی کہ متعلقہ محکمے اینڈرائیڈ فونز کااستعمال کرتے ہوئے انسداد ڈینگی کی سرگرمیوں کو باقاعدگی سے اپ لوڈ کریں اس سلسلے میں فرضی کاروائیاں نہیں ہونی چاہیئں۔