ڈپٹی کمشنر محمد شاہد اور ممبر قومی اسمبلی حاجی امتیاز احمد چوہدری نے کہا ہے کہ عالمی برادری مقبوضہ کشمیر میں کشمیر یوں پر بھارت کے غاصبانہ قبضے اور مظالم کا نوٹس لے، کشمیریوں سے ان کی آزادی کا حق کوئی نہیں چھین سکتا،انہوں نے کہا کہ 22کروڑ پاکستانی عوام کے د ل کشمیریوں کے ساتھ دھڑکتے ہیں.
انہوں نے کہا کہ پاکستان بالخصوص منڈی بہاﺅالدین کے عوام کشمیروں کے حق خودارادیت اور آزادی کی جدوجہد میں ان کے شانہ بشانہ کھڑے ہیں، کشمیریوں کی آزادی کا سورج جلد طلوع ہونے والا ہے، انہوں نے بتایا کہ وزیراعظم پاکستان عمران خان نے ہر عالمی فورم پر کشمیر کے حوالے سے پاکستانی قوم کا موقف ذمہ دارانہ انداز میں پیش کیا جس سے مسئلہ کشمیر عالمی سطح پر ایک بنیادی ایشو بن گیا ہے۔
منڈی بہاءالدین (ایم.بی.ڈین نیوز 7 فروری 2022) ان خیالات کا اظہار انہوں نے آج یہاں ضلع کونسل ہال میں یوم یکجہتی کشمیر کے موقع پر پرچم کشائی اور بھارت کے غاصبانہ قبضے کے خلاف احتجاجی ریلی کی قیادت کرتے ہوئے کیا۔ریلی کے شرکاءنے ہاتھوں میں کشمیر کے جھنڈے، یوم یکجہتی کشمیر کے بینرز اور نعروں سے مزین کتبے اٹھا رکھے تھے اور کشمیری عوام سے اظہار یکجہتی کے نعرے لگا رہے تھے۔ ریلی ڈسٹرکٹ کمپلیکس سے شروع ہو کر کینال ویو پارک کے سامنے اختتام پذیر ہوئی۔
ریلی میں ڈی پی او انور سعید کنگرا،ایڈیشنل ڈپٹی کمشنر جنرل محمد شفیق ، اسسٹنٹ کمشنر منڈی بہاﺅالدین کاشف جلیل، سی ای اوز، تعلیمی اداروں کے اساتذہ، طلباء، میڈیا نمائندگان، سیاسی سماجی رہنماﺅں کے علاوہ عوام الناس کی ایک کثیر تعداد بھی موجود تھی۔ڈپٹی کمشنر محمد شاہد نے کہا کہ آج یوم یکجہتی کشمیر کے موقع پر ہر پاکستانی نے مل کر پوری دنیا کو بھارت کا بھیانک چہرہ اور کشمیریوں پر جاری ظلم و ستم کو دکھا دیا ہے اور وہ دن دور نہیں جب کشمیر پر آزادی کا سورج طلوع ہو گا۔حکومت کی کامیاب خارجہ پالیسی نے بھارت کو مسئلہ کشمیر پر عالمی برادری میں تنہا کر دیا ہے۔
انہوں نے کہا کہ پاکستانی عوام کشمیریوں کی جدوجہد کی آزادی میں ان کے شانہ بشانہ کھڑی ہے اور ہر فورم پر ان کی بھر پور سیاسی، سفارتی اور اخلاقی حمایت کشمیر کی آزادی تک جاری رکھی جائے گی۔ڈپٹی کمشنر نے کہا کہ پوری پاکستانی قوم بالخصو ص منڈی بہاﺅالدین کے عوام کشمیری بھائیوں کی تحریک آزادی میں دی جانے والی قربانیوں کو خراج تحسین پیش کرتے ہیں۔
ممبر قومی اسمبلی حاجی امتیاز احمد چوہدری نے کہا کہ یہاں پر موجود عوام نے بھارت سمیت دنیا کو یہ پیغام دے دیا ہے کہ پاکستانی قوم ہر لمحہ ، ہر وقت کشمیریوں کے ساتھ کھڑی ہے اور ان کی تحریک آزادی کیلئے خون کا آخری قطرہ تک بہانے کیلئے تیار کھڑی ہے۔اسی طرح تحصیل پھالیہ اور ملکوال میں بھی یوم یکجہتی کشمیر منانے کے حوالے سے ریلیاں نکالی گئیں جن کی قیادت اسسٹنٹ کمشنر پھالیہ محمد عرفان ہنجرا اور اسسٹنٹ کمشنر ملکوال عثمان غنی نے کی۔