ڈپٹی کمشنر محمد شاہد نے کہا ہے کہ پولیو سے پاک پاکستان ہم سب کا اصل ہدف ہے، ضلع کے پولیو فری سٹیٹس کو برقرار رکھا جائے گا جس کیلئے ہر شخص اپنی ذمہ داری پوری کرے۔ ان خیالات کا اظہار انہوں نے ڈپٹی کمشنر آفس میں گزشتہ انسداد پولیو مہم کی کارکردگی کے حوالے سے منعقدہ جائزہ اجلاس کی صدارت کرتے ہوئے کیا۔
منڈی بہاﺅلدین( ایم.بی.ڈین نیوز 30 دسمبر 2021) اجلاس میں سی ای او ہیلتھ ڈاکٹر محمد الیاس گوندل، ڈسٹرکٹ ہیلتھ آفیسرز ڈاکٹر محمد افتخار، ڈاکٹر شکیل اقبال بٹ، ڈاکٹر محمد شکیل نذر، ڈپٹی ڈسٹرکٹ ہیلتھ آفیسر ڈاکٹر خالد عباسی، فوکل پرسن ای پی آئی رافعہ ناہید، ایس این اے نبیل قادر اور دیگر افسران بھی موجود تھے۔
ڈپٹی کمشنر کو گزشتہ پولیو مہم کے حوالے سے بریفنگ دیتے ہوئے سی او ہیلتھ ڈاکٹر محمد الیاس گوندل نے بتایا کہ ضلع منڈی بہاﺅالدین میں 13 دسمبر سے 17 دسمبر تک جاری رہنے والی گزشتہ مہم میں پانچ سال تک کی عمر کے 2 لاکھ 38 ہزار 292 بچوں کو پولیو کے قطرے پلائے گئے جبکہ 2 لاکھ 25 ہزار 428 بچوں کو پولیو کے قطرے پلائے جانے کا ہدف مقرر کیا گیا تھا، اس طرح مجموعی اوسط 105 فیصد رہی۔
انہوں نے بتایا کہ پولیو مہم کے دوران بچوں کو وٹامن اے کے کیپسول بھی دئیے گئے۔ سی او ہیلتھ نے مزید بتایا کہ پولیو مہم کے دوران 2333 ورکرز پر مشتمل محکمہ صحت کی 70 فکسڈ ٹیمیں، 43 ٹرانزٹ پوائنٹس، گھر گھر جانے والی957 ٹیمیں ،70 یوسی ایم اوز جبکہ 193 ایریا انچارج مقرر کئے گئے تھے۔ جس پر ڈپٹی کمشنر نے کہا کہ انسداد پولیو مہم کی کامیابی صحت مند پاکستان کی ضمانت ہے، قوم کے نونہالوں کو عمر بھر کی معذوری سے بچانا عبادت سے کم نہیں۔
انہوں نے کہاکہ معاشرے کے ہر طبقے کے والدین کا فرض ہے کہ وہ اپنے بچوں کو عمر بھر کی معذوری سے بچانے کیلئے پولیو ویکسین کے قطرے پلانے کیلئے محکمہ صحت کی ٹیموں سے تعاون کریں تاکہ ہم اپنی آنے والی نسلوں کو اس خطرناک اور موذی مرض سے محفوظ رکھ سکیں۔