ڈپٹی کمشنر محمد شاہد کی زیر صدارت اوورسیز پاکستانیوں کے مسائل سے متعلق کمیٹی میں جن میں اراضی پر قبضوں، مشترکہ راستوں پر آمدورفت میں رکاوٹ، جائیدادوں کی وراثتی تقسیم، رقوم کے لین دین، تجاوزات، دھوکہ دہی اور دیگر مسائل پر مشتمل24 شکایات پیش کی گئیں
منڈی بہاوالدین ( ایم.بی.ڈین نیوز 24فروری 2022 ) ان 24 شکایات میں سے9 درخواستوں کے حل کیلئے موقع پر ہی احکامات جاری کر دئیے گئے جبکہ بقیہ کیسز سے متعلق مختلف محکموں کے افسران کو اپنی پراگریس رپورٹ اور بعض زیر التوا کیسزمیں فوری کاروائی کر کے میرٹ پر سات سے دس دن میں رپورٹ پیش کرنے کی ہدایت کی گئی۔
اس موقع پر ڈپٹی کمشنر محمد شاہد نے کہاکہ سردار عثمان بزدار حکومت سمندر پار پاکستانیوں کو یہاں پر درپیش مشکلات کے حل اور انہیں تمام ممکنہ ریلیف فراہم کرنے کیلئے انتہائی سنجیدہ ہیں، بیرون ممالک میں مقیم پاکستانیز پاکستان کی شناخت اور سفیر ہیں ان کے مقامی سطح پرمسائل ترجیحی بنیادوں پر حل کئے جا رہے ہیں۔ انہوں نے افسران کو ہدایت کی کہ وہ اوورسیز پاکستانیز کے مسائل کے حل کرنے میں خصوصی دلچسپی لیں اوراعلیٰ حکام کی جانب سے احکامات پر عملدرآمد کو یقینی بنائیں۔
انہوں نے مزید ہدایت کی کہ اوورسیز پاکستانیز کو کیسز کے فیصلوں سے متعلق مکمل آگاہی بھی فراہم کی جائے اور وہ پوری تیاری کے ساتھ اجلاس میں شرکت کو بھی یقینی بنائیں۔انہوں نے کہاکہ اوورسیز کمیٹی کے اجلاسوں میں درخواستوں اور شکایات کا فوری نوٹس لے کر بلا تاخیر محکمانہ اقدامات کو یقینی بنانے کی ہدایات بھی جاری کی جاتی ہیں۔
ڈی پی او انور سعید کنگرا نے کہاکہ اوورسیز پاکستانیز کے مفادات کا تحفظ ہر صورت میں یقینی بنایا جائے گا۔ نا جائز قابضین اور دھوکہ دہی کے مرتکب افراد کو قانون کے شکنجے میں لایا جائے گا اور کسی فریق کے ساتھ نا انصافی نہیں ہونے دی جائے گی۔ اجلاس میں ایڈیشنل ڈپٹی کمشنر ریونیو ڈاکٹر احسان الحق ضیاء، اسسٹنٹ کمشنر منڈی بہاﺅالدین کاشف جلیل، اسسٹنٹ کمشنر پھالیہ محمد عرفان ہنجرا، اسسٹنٹ کمشنر ملکوال عثمان غنی، اٹارنی، پراسیکیوشن وریونیو افسران ، ممبر اورسیز کمیٹی فیصل گوندل، ترجمان اوورسیز کمیٹی حمزہ علی، مختلف محکموں کے افسران، درخواستگزار اور اوورسیز پاکستانیز کے نمائندے بھی موجود تھے۔