منڈی بہاﺅالدین( ایم.بی.ڈین نیوز 17 نومبر 2021) ایڈیشنل ڈپٹی کمشنر ریونیو احسان الحق ضیاء اور ڈسٹرکٹ چیئرمین اوورسیز کمیٹی محمد عارف گوندل نے کہا کہ سمندر پار پاکستانی وطن عزیز کیلئے گراں قدر خدمات سر انجام دے رہے ہیں ،حکومت سمندر پاکستانیوں کے مسائل کے حل کیلئے انتہائی سنجیدہ ہے اور اس سلسلے میں تمام سرکاری محکمے بھر پور اقدامات کر رہے ہیں۔
ان خیالات کا اظہار انہوں نے آج یہاں ڈپٹی کمشنر آفس میں ڈسٹرکٹ اوورسیز پاکستانیز کمیٹی کے اجلاس کی صدارت کرتے ہوئے کیا۔اجلاس میں اسسٹنٹ کمشنر منڈی بہاءالدین امتیاز علی بیگ، اسسٹنٹ کمشنر ملکوال عثمان غنی، فوکل پرسن و تحصیل کونسل آفیسر شہزاد اختر تارڑ، پراسیکیوشن وریونیو افسران ، ممبر اورسیز کمیٹی فیصل گوندل، ترجمان اوورسیز کمیٹی حمزہ علی ، مختلف محکموں کے افسران، درخواستگزار اور اوورسیز پاکستانیز کے نمائندے بھی موجود تھے۔
اجلاس میں اراضی پر قبضوں، مشترکہ راستوں پرآمدورفت میں رکاوٹ، جائیدادوں کی وراثتی تقسیم، رقوم کے لین دین، تجاوزات، دھوکہ دہی اور دیگر مسائل پر مشتمل درخواستیں اور شکایات پیش کی گئیں۔ قبل ازیں اجلاس میں اوورسیز پاکستانیوں کے مسائل سے متعلق کمیٹی میں25 شکایات پیش کی گئیں جن میں سے10 درخواستوں کے حل کیلئے موقع پر ہی احکامات جاری کر دئیے گئے۔
ایڈیشنل ڈپٹی کمشنر احسان الحق ضیاء اور چیئرمین اوورسیز کمیٹی محمد عارف گوندل نے کہا کہ سردار عثمان بزدار حکومت سمندر پار پاکستانیوں کو یہاں پر درپیش مشکلات کے حل اور انہیں تمام ممکنہ ریلیف فراہم کرنے کیلئے انتہائی سنجیدہ ہیں، اوورسیز کمیٹی کے اجلاسوں میں درخواستوں اور شکایات کا فوری نوٹس لے کر بلا تاخیر محکمانہ اقدامات کو یقینی بنانے کی ہدایات بھی جاری کی جاتی ہیں۔ انہوں نے مختلف محکموں کے افسران کو کیسز سے متعلق اپنی پراگریس رپورٹ اور بعض زیر التوا کیسزمیں فوری کاروائی کر کے میرٹ پر رپورٹ پیش کرنے کی ہدایت کی۔
انہوں نے متعلقہ اسسٹنٹ کمشنرز ، پولیس اور دیگر محکموں کو ہدایت کی کہ وہ اوورسیز پاکستانیز کے مسائل کے حل کرنے میں خصوصی دلچسپی لیں اوراعلیٰ حکام کی جانب سے احکامات پر عملدرآمد کو یقینی بنائیں۔انہوں نے کہا کہ اوورسیز پاکستانیز کے مفادات کا تحفظ ہر صورت میں یقینی بنایا جائے گا۔ نا جائز قابضین اور دھوکہ دہی کے مرتکب افراد کو قانون کے شکنجے میں لایا جائے گا اور کسی فریق کے ساتھ نا انصافی نہیں ہونے دی جائے گی۔