ڈپٹی کمشنر طارق علی بسرا نے کہا ہے کہ انسداد خسرہ مہم کو ہر صورت کامیاب بنایا جائے گا، قوم کے نونہالوں کو بیماریوں سے بچانے کیلئے تمام ممکنہ وسائل بروئے کار لائے جائیں، انسداد خسرہ مہم میں عوامی آگاہی کیلئے علمائے کرام اور میڈیا کے رول کو نظر انداز نہیں کیا جا سکتا، ان کی خدمات سے بھر پور استفادہ کیا جائے۔
منڈی بہاﺅالدین ( ایم.بی.ڈین نیوز 04 اکتوبر 2021 )ان خیالات کااظہا رانہوں نے آج یہاں ڈی سی آفس میں انسداد خسرہ مہم کی تیاریوں کے حوالے سے جائزہ اجلاس کی صدارت کرتے ہوئے کیا۔ اجلاس میں سی ای او ہیلتھ ڈاکٹر محمد الیاس گوندل، ڈسٹرکٹ ہیلتھ آفیسر ڈاکٹر افتخار احمد، ڈی ڈی ایچ اوز ڈاکٹر شکیل احمد، ڈاکٹر خالد عباسی، ڈسٹرکٹ فوکل پرسن برائے ای پی آئی/پولیورافعہ ناہید، ڈی ایچ سی ایس او یونیسیف محمد اقبال، پی اے ٹو سی او ہیلتھ ارسلان رﺅف کے علاوہ دیگر متعلقہ محکموں کے افسران بھی موجود تھے۔
سی او ہیلتھ نے اجلاس کو 15 نومبر سے 27 نومبر 2021 تک 13روزہ جاری رہنے والی مہم کی تیاریوں کے حوالے سے بتایا کہ اس مہم میں 9 ماہ کی عمر سے لے کر 15سال تک کے 6 لاکھ 63 ہزار 420 بچوں کی ویکسی نیشن کی جائے گی۔ اس مہم میں محکمہ صحت کی431 ٹیمیں ،78 فکسڈ سائٹس، 65ٹیم سپورٹس سنٹرز، 124 یو سی ایم اوز، 12 سپروائزرز ، 5ڈی ایچ ایم ٹی ، 65 فوکل پرسن ،65 ویسٹ مینجمنٹ فوکل پرسن،509 سکلڈ پرسنز، 509 ٹیم اسسٹنٹ، اور940سوشل موبلائزرز اس مہم میں حصہ لیں گے اور اس حوالہ سے مائیکرو پلاننگ کر لی گئی ہے ۔
انہوں نے بتایا کہ اس مہم کیلئے ضلع میں 65 سنٹرز قائم کر دئیے گئے ہیں ۔ یہ13روزہ مہم صبح 9بجے سے لے کر شام 4بجے تک جاری رہا کرے گی۔انہوں نے بتایا کہ محکمہ تعلیم کے افسران کے ساتھ اجلاسوں کے انعقاد کے علاوہ نجی اور سرکاری سکولوں کیلئے فوکل پرسنز کو مقرر کرنے اور تمام تعلیمی اداروں کے سربراہوں کو ڈیٹا فراہم کرنے کی ہدایات جاری کر دی گئیں ہیں ۔
انہوں نے مذید بتایا کہ سکولز انتظامیہ کی معاونت سے یو سی ایم اوز نے رجسٹریشن کا کام معیاری پرفارمے پر مکمل کر لیا ہے ۔ جس پر ڈپٹی کمشنر نے محکمہ صحت کے افسران کو ہدایت کی کہ وہ انسداد خسرہ مہم کی کامیابی کے حوالے سے محکمہ صحت کی ٹیموں کے ساتھ گھر گھر جا کر ناصرف خسرہ کے مرض کے حوالے سے بلکہ احتیاطی تدابیر اور علاج کے حوالے سے بھی آگاہی دیں تاکہ ضلع کو خسرہ فری بنانے میں مدد مل سکے۔