منڈی بہاﺅالدین( ایم.بی.ڈین نیوز 28 اکتوبر 2021) وزیراعلیٰ پنجاب سردار عثمان بزدار کی ہدایت پر اسسٹنٹ کمشنر پھالیہ ساجد منیر کلیار نے آج علی الصبح شہر کی سبزی وپھل منڈی کا اچانک دورہ کیا۔ انہوں نے سبزی و فروٹ منڈی میں بولی کے عمل کا جائز ہ لیا ۔ انہوں نے مختلف دکانوں اور گوداموں کا معائنہ کرنے کے بعد اپنی نگرانی میں بھی پھلوں اور سبزیوں کی نیلامی کروائی۔
انہوں نے سبزی منڈیوں میں خریداری کیلئے آنے والے دکانداروں اور صارفین سے اشیاء کی قیمتوں اور کوالٹی سے متعلق استفسار بھی کیا جس پر وہاں موجود صارفین نے اپنے اطمینان کا اظہار کیا۔ انہوں نے آڑھتیوں اور نیلامی کے ممبران سے کہا کہ وہ عوام کی قوت خرید کے مطابق حکومت کے مقرر کردہ ریٹس پر پھل اور سبزیاں فروخت کریں اور صارفین کے حقوق کا خیال رکھیں۔ انہوں نے کہا کہ وزیراعلیٰ پنجاب سردار عثمان بزدار کی خصوصی ہدایت پر حکومت پنجاب نے صوبہ بھر میں گراں فروشی اور ذخیرہ اندوزی کرنے والے عوام دشمن عناصر کو کیفر کردار تک پہنچانے کیلئے کریک ڈاﺅن جاری ہے۔
انہوں نے کہا کہ اشیائے خوردونوش کو ذخیرہ کرنا یا مہنگے داموں بیچنا ایک ناقابل ضمانت سنگین جرم ہے جس کی انسداد ذخیرہ اندوزی آرڈینینس 2020 کے تحت 3 سال قید کی سز ا اور ضبط شدہ مال کو 50 فیصد بطور جرمانہ عائد ہے ۔ انہوں نے کہا کہ ہر سبزی اور پھل پر الگ الگ سرکاری نرخنامہ آویزں کرنا لازمی ہے ۔ انہوں نے عوام الناس سے اپیل کرتے ہوئے کہا کہ شہری اپنی ذمہ داری نبھائیں ، ذخیرہ اندوزی میں ملوث عوام دشمن عناصر کی اطلاع ہیلپ لائن 0800-02345 پر دیں ۔
انہوں نے کہا کہ حکومتی ہدایت کی روشنی میں ضلع اور تحصیل کی سطح پر قیمتوں میں استحکام کیلئے انتظامیہ پھل سبزی منڈی اور مارکیٹوں میں اشیائے خوردونوش کی قیمتوں کی سختی سے مانیٹرنگ کر رہی ہے ۔ انہوں نے آڑھتیوں اور نیلامی کے ممبران پر واضح کیا کہ صارفین کے حقوق کا خیال کرتے ہوئے عوام کی قوت خرید کے مطابق مقرر کردہ ریٹس پر ہی پھل اور سبزیاں فروخت کریں بصورت دیگر ناجائز منافع خوری پر سزا بھگتنا پڑے گی۔