پنجاب میں مون سون بارشوں کا ساتواں سپیل آج سے شروع ہونے والا ہے جس کے حوالے سے پی ڈی ایم اے نے شہریوں اور ضلعی انتظامیہ کو ہائی الرٹ کر دیا ہے۔
ترجمان پی ڈی ایم اے کے مطابق بالائی پنجاب میں 13 سے 17 اگست تک بارش کا امکان ہے، میدانی اضلاع میں 18 سے 21 اگست تک بارشوں کی پیشگوئی کی گئی ہے۔
بارش سے متاثر ہونے والے علاقوں میں بالائی علاقے، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد شامل ہیں۔
لاہور، سیالکوٹ، نارووال، شیخوپورہ، ساہیوال، جھنگ، ٹوبہ ٹیک سنگھ، خوشاب، سرگودھا، میانوالی، ننکانہ صاحب، چنیوٹ، فیصل آباد، اوکاڑہ کے میدانی اضلاع میں شہری سیلاب کا امکان ہے۔ ڈیرہ غازی خان، بھکر، بہاولپور، خانیوال، وہاڑی، لودھراں، راجن پور میں بھی الرٹ جاری کر دیا گیا ہے۔
لاہور، راولپنڈی، گوجرانوالہ، سیالکوٹ میں شہری سیلاب کا خطرہ ہے۔ مری اور گلیات میں موسلادھار بارشوں اور لینڈ سلائیڈنگ سے دریاؤں اور ندی نالوں میں طغیانی کا خطرہ ہے۔ خستہ حال اور کمزور مکانات کو نقصان پہنچنے کا خدشہ ہے۔