ایڈیشنل ڈپٹی کمشنر جنرل محمد شفیق نے کہا ہے کہ تعلیم، صحت اور دیگر سہولیات کی فراہمی کیلئے چھوٹے کنبے کو رواج دینا وقت کی اہم ضرورت ہے ، مذہب بھی بچوں کی پیدائش میں وقفے کی اجازت دیتا ہے
منڈی بہاﺅالدین ( ایم.بی.ڈین نیوز 28 اکتوبر 2021 ) انہوں نے کہاکہ ضلع میں محکمہ بہبود آبادی کے تمام شعبہ ہائے جات میں سروس ڈیلیوری سسٹم کی کارکردگی میں مزید بہتری لائی جائے۔ انہوں نے مزید کہا کہ بڑھتی ہوئی آبادی کی روک تھام کیلئے آگاہی مہم کو فعال اور موثر بنایا جائے، انہوں نے مذید کہا کہ محکمہ صحت اور بہبود آبادی کو مربوط انداز میں کام کرنے کی ضرورت ہے کیونکہ دونوں محکموں کا بنیادی طورپر تعلق انسانی صحت ہے۔
ان خیالات کا اظہار انہوںنے آج یہاں ڈی سی آفس میں محکمہ بہبود آبادی کی ماہانہ کارکردگی کے حوالے سے ڈسٹرکٹ کوآرڈی نیشن کمیٹی کے اجلاس کی صدارت کرتے ہوئے کیا ۔ اجلاس میں ڈپٹی ڈسٹرکٹ پاپولیشن ویلفیئر آفیسرعتیق الرحمٰن، میڈیکل سپرنٹنڈنٹ ڈسٹرکٹ ہیڈ کوارٹر ہسپتال ڈاکٹر قمر الزمان گورائیہ، انچارچ فیملی ہیلتھ کلینک ڈاکٹر شاہین اختر، اسسٹنٹ ڈائریکٹر ایجوکیشن اور دیگرمحکموں کے افسران نے شرکت کی۔
ڈپٹی ڈسٹرکٹ پاپولیشن ویلفیئر آفیسر عتیق الرحمٰن نے شرکاء اجلاس کو محکمہ بہبود آبادی کی جانب سے فراہم کردہ سہولیات ، آگاہی اور دیگر متعلقہ امورز پر تفصیلی بریفنگ دی ۔ انہوں نے اجلاس کوماہانہ کارکرگی کے حوالے سے بتاتے ہوئے کہا کہ رواں ماہ کے دوران محکمہ بہبود آبادی نے ضلع کے مختلف علاقوں میں کیمپس لگائے اور ایک ہزار 163 افراد کو مانع حمل ادویات اور دیگر سہولیات فراہم کیں ۔
انہوں نے بتایا کہ محکمہ بہبود آبادی کی فیلڈ ورکنگ سرگرمیوں کی وجہ سے عوام الناس میں درمیانی مدت کے مانع حمل ادویات کے استعمال میں اضافہ ہوا ہے۔ انہوں نے مزید بتایا کہ ضلع میں کوویڈ 19کے دوران ایس او پیز کو مد نظر رکھتے ہوئے 52 فلاحی مراکز اور 2 فیملی ہیلتھ کلینکس عوام الناس کو خاندانی منصوبہ بندی کے لحاظ سے معیاری طبی سہولیات مہیا کر رہے ہیں۔ علاوہ ازیں دور دراز علاقوں میں محکمہ صحت کی معاونت سے محکمہ بہود آبادی کے 2 فری فیملی ہیلتھ موبائل یونٹ قائم کر کے لوگوں کو ماں اور بچے کی صحت اور خاندانی منصوبہ بندی کے حوالے سے سہولیات مہیا کر رہے ہیں۔
انہوں نے بتایا کہ محکمہ صحت ، محکمہ تعلیم اور دیگر تمام لائن ڈیپارٹمنٹ بھی محکمہ بہبود آبادی کے ساتھ مل کر عوام الناس کو ضروری آگاہی جیسی سہولیات فراہم کر رہے ہیں ۔ انہوں نے اجلاس کو بتایا کہ حکومتی ہدایت پر رواں ماہ میں محکمہ بہبود آبادی نے مختلف محکمہ جات کی معاونت سے کالجز میں حفظان صحت سے اصولوں سے متعلق خصوصی سیشنز ، فٹبال میچ شو اور شان رحمت اللعالمین کے حوالے سے پروگرامز کا انعقاد کیا گیا ۔
جس پر ایڈیشنل ڈپٹی کمشنر نے کہا کہ بلاشبہ محکمہ بہبود آبادی کا بنیادی کام ہی عوام الناس کو مختلف طریقوں سے آمادہ کر کے خاندانی منصوبہ بندی پر عملدرآمد کروانا ہے جس کیلئے محکمہ بہبود آبادی اپنے کوالٹی آف ورک کو اہداف کے ذریعے مذید موثر اور یقینی بنائے ۔ انہوں نے کہا کہ محکمے کی سرگرمیوں کے حوالے سے جہاں جہاں خامیاں پائی جاتی ہیں ان کو درست کر کے مذید موثر اور فعال بنایا جائے ۔