پنجاب ڈیزاسٹر مینجمنٹ اتھارٹی (پی ڈی ایم اے) کے ترجمان کے مطابق مون سون کے ساتویں سپیل کے تحت آج سے پنجاب کے بیشتر اضلاع میں موسلادھار بارشوں کا امکان ہے۔ بارشوں کا یہ سلسلہ 23 اگست تک جاری رہ سکتا ہے۔
پی ڈی ایم اے کے ترجمان نے بتایا کہ راولپنڈی، مری، گلیات، جہلم، چکوال اور اٹک میں بادل پھٹنے کے خدشات ہیں۔ لاہور، شیخوپورہ، منڈی بہاؤالدین، گوجرانوالہ، حافظ آباد، وزیرآباد، سیالکوٹ، نارووال، ساہیوال، جھنگ میں بھی موسلادھار بارش کا امکان ہے۔
اس کے علاوہ ٹوبہ ٹیک سنگھ، ننکانہ صاحب، چنیوٹ، فیصل آباد، اوکاڑہ، قصور، خوشاب، سرگودھا، بھکر، بہاولپور، میانوالی، بہاولنگر، ڈی جی خان، ملتان، مظفرگڑھ، خانیوال، لودھراں، راجن پور، رحیم یار خان اور لیہ میں بھی بارش کا امکان ہے۔
ڈی جی پی ڈی ایم اے کے مطابق بالائی علاقوں میں بارشوں سے دریاؤں کے بہاؤ میں اضافے کا خطرہ ہے۔ بارشوں کے باعث دریائے سندھ، راوی، جہلم، ستلج اور چناب کے بہاؤ میں نمایاں اضافہ ہوسکتا ہے۔
ڈی جی پی ڈی ایم اے کا کہنا تھا کہ کالاباغ، چشمہ، تونسہ میں درمیانے درجے کا سیلاب ہے جب کہ تربیلا کے مقام پر نچلے درجے کا سیلاب ہے۔ دریائے ستلج میں گنڈا سنگھ والا اور سلیمانکی کے مقام پر نچلے درجے کا سیلاب ہے۔
